النور قطع
والصمت حاضن
كل جدران البيوت
قلب السكوت
بيدق مرعوب م اللقا
مع صوت عقارب
ساعة من حزني القديم
سرسوب دموع
فتحت سدود علشان يسيل
فيضان الم
أسرار كتير قادر يحركها الهوا
ساعة نزول نقطة مطر
من قصة كنا زمان بنحكيها سوا
دلوقتي بقت القصة نص رغيف
محتاج يلاقي النص علشان يفرحوا
مين فينا عايش مختلف
مين فينا عمره ما حب قلب بيجرحه؟
النور مجاش!!!
اشمعنا غاب المرة دي؟
دايما بيقطع ساعة واحدة
وييجي جري
ليه طال بعاده
وساب دموعي يكمّلوا
في هد الجدار
ده انا كنت دايما بستلف
فرحة بسيط
وبقول على اللي بيدمعوا
دي عيال صغار
ما تقيد يا نور
خليني ارجع تاني
وانسا اللي اتعمل
النور مجاش
غاوي العناد
كانوا ابويا دايما بسمعه
بيقوللي يابني
اوقات طلوع الشمس بيبقى
رحمة للعباد
والموت ماهواش قبر ضيق
يتملي بحبة رماد
الموت ده ضلمة بتخطفك
من غير ميعاد
فجأة اتقطع
صوت العقارب في الساعات
ودموعي وقفت كلها
او يعني خلصت م العينين
والجفن باش
والقلب من خوفه اتقتل
والحزن عاش
والليل اديله سنين
بيشتاق للنهار
بس النهار علشان يكون
لازمله نور يعلن وجوده
والنور مجاش
#هشام_الشاطر
