العنصريه والطبقيه

بقلم: هالة ابو الفتوح
عشت 7 سنين في عمل بيعتبرني مش مهندسه لأني مش كهرباء وبيعتبر ناس تانيه أقل بدرجات كثيره لأنهم مش مهندسين أصلا…

وعشت عمر بحاله مشار إلي بأني لا أرقى إلى مستوى الكائن الآخر …. الذكر….مع إنه ليس لديه أي أعضاء زياده آه وربنا ..

وعشت عمر في دوله عربيه شقيقة لا هما إعتبروني منهم ولا المصريين إعتبروني منهم وبقيت في صراع على الهويه ما بين الوطن الأم والوطن المنشأ وفي النهاية غيرت تعريف الوطن إلى السكون إلى روح الله 

ما زلت أعيش في عالم يعتبرني مشكله لأني مختلفه, متمرده لأني لا أقبل أن أعيش في تلابيب الآخرين, تحيطني سذاجه فطريه أساسها أن لا ضرر ولا ضرار, وما زلت أتعلم 

الوزير إستقال أو أقال… طيب بالنسبه لبقية الشعب العنصري العنجهي الفرعوني الذكوري الطبقي حنعالجه إزاي !!!

حرقكم قوي كلام الوزير !!! جميل !!! وبالنسبه للعنصريه اليوميه اللي بنعيشها يوميا حنقيل مين علشان نحس بالراحه ! صدقوني نفسي أتنفس الراحه …

العنصريه والطبقيه موجوده من أول الكائن الإنسان والمصري خصوصا لما بيتولد…تنتقل عن طريق العائله اللي ليه ما تبقاش زي إبن خالتشك وتخش أميريكان! ثم تنتقل إلى المدرسه ثم إلى الجامعه وليه ما تبقاش زي إبن طنت حكمت وتخش طشيب!!! أو صيدله أو أسنان ؟؟ المهم اللقب ثم إلى العمل ومنها إلى المجتمع …… آآآآآآآآآآآآآآآآآآآآآآآآه إنت مش مهندس كهرباء !!!! تبقى واخد الهندسه من تحت بير السلم …. أو محهد …. أكيد مش كليه… وهي عماره دي شعبه؟؟ وإيه يعني ما هو معهد القطن بيخش النقابه!!! كله يجوز لكن إنك تتغر وتفتكر إنك ممكن تكون بني آدم أو حتى تحلم بكده مش من حقك … أصلك محهد أساسا مش كليه …. ثم تتجوز علشان لازم تتجوز آه أمال !!! وتجيب النيش … ما إنت لازم تجيب النيش ما فيش جوازه من غير نيش …. ولازم تخلف بقى الخطوه القادمه ولد يبقى لازم تخاويه … بنت يبقى لازم تجيبي ولد ….لازم البفتيك علشان ما حدش يقول علينا حاجه على رأي عبد المنعم مدبولي الله يرحمه في رائعة الحفيد, صحتك تعبت طيب تمام إتعالج في أبو فلوس أصل التأمين صحي الناس بتموت فيه …. طيب لو مش معايا أبو فلوس …. إمممممم … روح موت برضه …

العنصريه والطبقيه وجدت وكان ما كان, الفكره في إننا نوقفها وإننا نمنع عنها الغذاء والهواء … لكن طول ما إحنا بنشحنها بصفه يوميه مش حتموت وحتنمو منها غابات من الغدر والكراهيه وأنا شخصيا شايفه كام غابه حواليا وبيزدادوا كبرا … بس الله المستعان

لا إستقاله ولا إقاله بقت تعالجها … إشتغلوا على نفوسكم وأرواحكم ومبادئكم وأفكاركم … طلعوا دماغكم من الوحل وإتنفسوا فطرة ربنا…وحاولوا تنقلوا ده لأكبر قدر من البشر عن طريق المثل الأعلى وحاولوا ما تجرحوش البشر القلوب مليئه بما يكفيها من الألم.