بقلم / ايهاب سعيد
سهل جداً إنك تختار هدفك لكن عمرك ما هتقدر تحققة إلا إذا فهمت الأول قوانين الكون اللي إنت عايش فية ، ولازم في الأول نتفق إن مفيش حاجة حصلت أو بتحصل أو هتحصل إلا وفقاً لهذه القوانين من الأخر لو عايز تحقق أي شيء لازم الأول تتعرف علي هذه القوانين ..
عشان كده هشرحلكم القوانين دي بشكل مُبسّط جداً
القانون الأول (قانون السببية)
أي نتيجة بتوصلها بتكون أفعالك هي اللي وصّلتك ليها مش حاجه تانيه سواء كانت نتيجة إيجابية أو سلبية ، يعني لو عايز توصل لنتيجة إيجابية لازم تتبع الخطوات الصحيحة اللي ناس كتير قبلك إتبعوها وحققوا بها نتائج إيجابية زي مثلاً إتباع قاعدة SMART في وضع أهدافك.
القانون الثاني (قانون النسبية)
كل حاجه في الكون نسبية يعني لو فية حاجه صعبة عليك هي صعبة بالنسبة لوضعك الحالي لكن بمجرد إنك تتمرن وتعتاد عليها هتكون بالنسبالك سهله جداً وكل ما ترتقي بأدائك وأسلوب تفكيرك كل اللي صعب عليك النهاردة هيبقى عاده بتعملها وإنت مغمض.
القانون الثالث (قانون التضاد)
كل حاجة بتحمل الجمال والقبح في نفس الوقت وأنت ليك الحرية عايز تشوف أنهي فيهم ، عوّد نفسك دايماً أنك تشوف الجانب الأجمل في كل شيء.
القانون الرابع (التحوّل الدائم للطاقة)
الطاقة عمرها ما بتخلص لكن دايماً في تحوّل مستمر ، الأفكار مثلاً صورة من صور الطاقة وعشان تطبق القانون ده لازم تحوّل الطاقة دي لصورة مادية يعني الفكرة دي تحولها لنتيجة ملموسة ، لكن لازم تعرف كويس إن الفكرة الإيجابية هتوصلك لنتيجة إيجابية .. والعكس.
القانون الخامس (قانون الحضانة)
أغلبنا بيفتكر إنه لما يعمل مجهود دلوقتي هيحصد ثماره برضوا دلوقتي ، القانون ده بيعلمك إن كل حاجه لازم تاخد وقتها عشان تؤتي ثمارها ، كل حاجه بتبدأ بتحتاج وقت حضانة ومراحل نضوج عشان تظهر في صورتها المادية وتقدر بعد كده تجني ثمرة مجهودك.
القانون السادس (قانون التذبذُب)
لا يوجد شيء في الكون ثابت فكل ما حولنا يهتز وبسرعة عاليه جداً بس إحنا مش بنقدر نشوفها بالعين المجردة ، لكن تحت المجهر هنقدر نشوف الجزيئات اللي بيتكون منها كل شيء في الكون تهتز بس كل حاجه تهتز بترددات مختلفة في الثانية الواحدة والأشياء التي لها نفس التردد تنجذب وتتناغم مع بعضها ومن هنا يجي “قانون الجذب” ، يعني لما تفكر في حاجه إيجابية هتستدعي كل الحاجات الإيجابية اللي بتحمل نفس الترددات وكذلك نفس الشيء في الأفكار السلبية.
القانون السابع والأخير (قانون الإيقاع)
الليل بيجي بعده النهار والنهار بيجي بعده الليل وده الإيقاع الكوني وإحنا ننتمي اليه ، كل حاجه بتتغير ومفيش حال بيفضل علي وضعه ولازم نعرف إن كل محنة سوف يقدّر الله بعدها خير.
