ناعم جدا ومتماسك وطعمه روعه
مع بعض التكات اللي تخليه يطلع مضبوط جدا .
مقدمة من / سلوى نبيل
وقت التحضير / 20 دقيقة
وقت الخبز / 80:90 دقيقة
المقادير :
٥ كوب لبن
٧ بيض احمر كبير
فانليا نص معلقه صغيره للبيض ونص معلقه صغيره للبن .
١٠ معالق كبيره سكر للبن
مقادير الكرامل :
٢ كوب سكر
نص كوب ماء
نص لمونه
رشه بسيطه فانليا
الطريقة :
– نضرب البيض والفانليا ضرب خفيف بمضرب سلك يدوي أو شوكه لا خلاط ولا هاند بلندر علشان منعملش رغاوي وفقاقيع هوا تخلي وش الكرامل خشن .
– في حاجه غويطه تانيه حنحط اللبن وعليه السكر وندفيه على النار يكون دافي زي دمعه العين اللبن ميسخنش اوي علشان البيض حيستوي ويعمل كلاكيع .
– نشيل اللبن من على النار ونضيف عليه البيض المخفوق ونقلب .
– نصفي الخليط الخطوه دي لااااااازم ومهمه جدا .
– نسيبه على جنب لغايه ما نعمل الكرامل .
طريقه الكراميل :
– نحط السكر والميه ورشه الفانليا على النار لما تغلي نحط نقطتين لمون وممكن معلقه عسل جلوكوز لو موجود .
– نقلب السكر تقليب متواصل لغايه ما نوصل للون دهبي غامق ناخد بالنا كويس لو السكر اغمق حيبقى طعمه مر .
طريقه التسوية :
– نحط القوالب في صنيه اقل من نصها ميه ونحطها على نار متوسطه نغطي القوالب بصنيه او اي غطا ونخليه موارب ضررروري عشان ميحصلش تكثيف للميه وتنزل على الكرامل .
– نعرف انه استوى ازاي ندخل فيه طرف سكينه زي الكيك لو طلعت نطيفه يبقى استوى طلع فيه كريمه يبقى نسيبه شويه كمان .
و الف هنا على قلوبكم يارب
مدير مطبخ سحر الحياة / نيفين منصور
