د.غادة فتحي الدجوي
دايما بنسمع في الأيام الأخيره عن مكياج لتوسيع العيون ، لكن يا تري لما العيون توسع هتشوف كتير و لا هتشوف بعمق و هو كل عين شكلها جميل بتشوف الدنيا جميلة …لكن الحقيقة الأهم من توسيع العيون … توسيع القلوب ..و انهارده محتاجين نعرف خطوات مكياج توسيع القلوب… و دايما نسمع ربنا ينور بصرك و بصيرتك.
ربنا خلقنا قلوب نابضة بالحب و الحياه و احنا اللي بنكتسب الحقد و الكراهية او أي صفات سلبية لكن رب العالمين خلق القلوب صافية الطفل بيتولد و يفتح عيونه و يتفرج علي العالم و أول عالم له أسرته الصغيرة بيتفرج عليهم و و يلاحظ تصرفاتهم و كأنه بيتابع فيلم و يحرك جسمه و يحاول يمسك العالم بإيديه، تفتكروا وقتها الطفل بيشوف العالم ده ببصره و لا ببصيرته؟ من وجهه نظري بالإثنين لأنه بيشوف ببصره لكن بيفرح و يتعامل بالبصيرة بالقلوب ، لما تنظر له و تكشر يبكي و لما تنظر له و تضحك بيضحك و يرفرف بإيديه و يحاول ينط في الهوا علشان يوصل لك بقلبه و بصيرته رغم إنه حاضنك بعنيه اللي مليانه نور و شقاوة و كمان فضول .
طيب ليه احنا لما بنكبر بنتغير اذا كان النظر مع السن بيضعف و بنعمل نضارة تقوي النظر علشان نشوف احسن و لما حد بيفرجنا أي حاجة نقوله استني لما ألبس النظارة علشان أشوف كويس، أو لما أسوِّق لازم نظارة المشي و لما اقرأ لازم نظارة القراءة…يعني بنوسع عينينا بأساليب تعويضية يعني مكياج ، يعني احنا دايما عندنا حلول لنور البصر … يا تري عندنا حلول لتوسيع البصيرة أو تنويرها ” اللي هي القلوب و المشاعر”، عارفين في جملة بنقولها في أخر الرسائل ” شكراً لسعة صدرك ” يا تري حد قالها لكم اهي دي برده بصيرة….و في الموسوعات بيقولوا معني البصيره ” الادراك ، الفطنة، الحجة و النظر النافذ الي خبايا الأشياء و العلم و الخبرة” و كلها معاني قابلة للمزيد و الزيادة في التحصيل و التطوير من و مع الحياة و قعدت أفكر يا تري نقدر نوسع قلوبنا و نشوف ببصيرتنا ؟ طيب نعمل ايه؟؟!
خطوات صغيرة استوحيتها من أينشتاين أولها افتح قلبك لنفسك و اتكلم معاها بصراحه، طول ما أنت عايش اتعلم لأن العلم بيخلينا نفكر أحسن و نرتقي بعقلنا و قلبنا، احترم خصوصية عالمك انت هتلاقي نفسك من غير ما تشعر هتحترم خصوصية الناس حواليك، ضميرك جرس متوقفوش دايما يرن متخالفوش لأن في وقت بنندم من غير ما ينفع نرجع، اعمل كل حاجة حلوة مش علشان أنت خايف من العقاب و لا محتاج مكافئة ، خليك بسيط في كلامك و أفعالك و صريح و واضح هتلاقي الحياه أسهل، و البساطة مش معناها التفاهه ، لو قرأت كتير و استخدمت عقلك قليل هيبقي عندك كسل في التفكير، لو لم تخطأ تكون مجربتش أي شيء جديد في حياتك، الفنون و العلم و الحب من أهم المعلمين في الحياة، تقبل الحقيقة في كل أمورك الصغيرة علشان الناس تثق فيك في أمورك الكبيرة، دروس الحياه هي اللي بنفتكرها أكتر من دروس المدرسة .. احرص علي التعلم من الحياة كتيير ، الجاهل هو الذي يغضب دايما، الفضول نعمة حافظ عليها لكن الفضول و ليس التلصص، الإبداع معدي و ده جماله، المستقبل قريب قوي متفكروش فيه لكن عيشوا اليوم لأنه اكتر قرب، الخيال أهم من المعرفة لأنه بيدور بيك في العالم لكن المعرفة هتوصلها بسرعه .. شغل خيالك علشان هو اللي هيخليك تتعلم،كلنا في الدنيا علشان ناس تانية هما بيسعدونا و احنا بنسعدهم، و مش لازم ابدا تكون موهوب لكن ممكن تكون شغوف لمعرفة اللي بيدور حولك، لما تكتشف حاجات جديدة معناها انك قضيت وقت كتير في حل مشاكل، ابحث عن القيمة مش عن النجاح، كلنا بنولد عباقرة لكن بننسي تشتغل علي نفسنا، الغموض منبع الفنون و العلوم و دايما تقفل عينك و تفكر و خيالك يكون أوسع، العالم يمكن يكون مكان خطير لكن مش علشان الناس الأشرار اللي ممكن يعيشوا في وسطنا لكن علشان اللي بيشوفوا الشر و مش بيوقفوه، العالم مش هيتغير الا اذا احنا اللي اتغيرنا، اربط حياتك بهدف مش باشخاص هتعيش أحسن، و من عندي … أحبوا ففي الحب بركة تزيد ضخ الدم في القلب فينبض بحيويه و و تشع في عيونكم نور .. نور يجعلكم تروا النور اللي داخل الأشياء و الأشخاص فلا تنطق ألسنتكم الإ بالمودة و الرحمة فتزيد محبتكم عند الأخرين فيرتد لك النور و الحب…. و تيجي الدعوة اللي بنحبها من اللي حوالينا و خصوصاً أمنا ” ربنا يحبب فيكم خلقه” و صدقوني ساعتها هتبقوا منورين البصر و البصيرة … و تكونوا اصحاب القلوب الكبيرة ” الواسعة”.
” اللهم حبب فيكم خلق الله”
