عبدالعزيز موسى
………..
تعدى السنين
وكأنها لسه هنا
وكأننا كله ف مكانه
أولاد شارعنا المرصوصين
على ناصيه الحلم إللى أصبح سراب
وماتوا عشانه
كان جوة كل واحد فيهم ميدانه
بيفتشو جيوب القمر
عن ضحكه غابت من زمن
وبيعزفوا للفرح ألحانه
كانت عنيهم
تتحدى نور الشمس
تغرى القمح تطرح عيدانه
لو حتى الأرض مش ارضه
ومجاش اوانه
الدم سال من الأسفلت يروى غيطانه
كانت أيديهم تطول السما
تكبر فى حضن الفجر يصحى ادانه
ثم مر الحلم طايش
سبع سنوات
سبع لفات
ف ديل الديب مطلع لسانه
وعاد الولاد
على ناصيه الشارع
بعد اما خلى من كل سكانه
…
