بقلم دكتورة زينب زكى
لازم نسمع كلام بابا وماما ونهتم بصحتنا وناكل سندوتشاتنا علشان الهدلد الحكيم يلعب معانا زى عمر وياسمين
كان يا ما كان يا سعد يا اكرام ما يحلى الكلام الا بذكر النبى عليه الصلاة والسلام
كان فيه ولد جميل زى القمر واسمه عمر وكمان كان فيه أخته ياسمين الجميلة زى زهرة الياسمين .. يا ترى ايه اللى حصل ؟؟؟؟؟ تعالوا نشوف ……
عمر وياسمين أولاد شاطرين وحلوين وبيسمعوا كلام باباهم ومامتهم وباكلوا سندوتشاتهم وكل يوم بابا محمد ياخدهم ويستنوا باص المدرسة جنب الشجرة الكبيرة وفى يوم من الأيام وقف هدهد جميل على الشجرة يبصلهم ويلاعبهم وهما كمان كانوا به فرحانين .. وكل يوم ينزلوا يجروا علشان يشوفوا الهدهد ويلعبوا معاه اطول وقت ممكن قبل باص المدرسة ما يوصل .. لكن .. بدأوا يهملوا فى فطارهم وماما زعلت جدا منهم وكمان بابا وكل دا علشان ينزلوا يجروا ويلعبوا مع الهدهد الجميل .
لكن بابا محمد فكر يعمل ايه علشان عمر وياسمين يرجعوا تانى زى الاول شاطرين .. قرر يشتكيهم للهدهد ويقوله اوعى تانى للأولاد تظهر ولا معاهم تلعب غير لما يرجعوا زى الاول شاطرين ويسمعوا الكلام وياكلوا سندوتشاتهم .. زعل الهدهد منهم وقال ازاى يعملوا كدا انا بحبهم جدا علشان هما شاطرين ولو ما سمعوش كلام بابا وماما واكلوا سندوتشاتهم مش هلاعبهم تانى ولا هخليهم يشوفونى على الشجرة الكبيرة
وفعلا الهدهد استخبى ورا الشجرة الكبيرة ونادى على عمر وياسمين وقالهم يا اصدقائى الحلوين زعلان منكم علشان بقيتوا مش شاطرين ليه مش بتسمعوا كلام بابا وماما ومش بتاكلوا سندوتشاتكم .. أنا زعلان منكم وهفضل مستخبى لحد ما ترجعوا شاطرين اكتر من الاول
وبسرعة عمر وياسمين رجعوا زى الاول شاطرين يسمعوا كلام بابا وماما وياكلوا سندوتشاتهم
فرح الهدهد لما سمعوا كلام بابا وماما ورجع من تانى كل يوم يظهرلهم على الشجرة الكبيرة ويلاعبهم
وتوتة توتة خلصت الحدوتة
تحياتى للجميع
