بقلم: رانيا الرباط
(.) نقطة…كتير مننا مابيديش علامات الترقيم حقها رغم أنها شديدة الأهمية؛وأهميتها تكمن في أنها لغة لوحدها؛ممكن تختصر كلام كتير أوى؛ممكن تغير حاجات كتير أوى؛ممكن تبدل مصير.
ده الحال مع (النقطة) اللي ممكن تنهى نقاش طويل دخل في سكة غلط أوفي سكة مقفولة فبدل ما الأنسان يبرر ويفسر ويشرح أو بعد ما يكون فعلاً عمل كل ده لكن مفيش فايدة في دماغ اللي قدامه لا عايز يقتنع ولا عايز يفهم وده أسبابه كتير منها مثلاً المكابرة ومنها أن أصلاً مش بيتيح لنفسه فرصة يمرر الكلام علي دماغه ويحاول يفكر فيه عشان ممكن يقتنع به لأنه رافض ده بسبب تعنت بسبب غلاسة بسبب أحقاد أو إحباط أو جهل بيحاول يداريه ورا عناده، فتيجى النقطة اللي بتقفل السطر واللي مابنبتديش بعدها سطر تانى ودى ممكن تكون نهاية علاقة أستنفذت منا كتير من أعصابنا وفكرنا ونفسيتنا وغيرت حاجات كانت حلوة جوانا وبدلتها بحاجات سيئة، النقطة ممكن تنهى علاقة فعليا ًوممكن تموت علاقة أكلينيكياً فبالرغم من أنى معاك بجسدى لكن لا روحى ولا فكرى معاك ودى علاقة ناس كتير مبتقدرش تقول ما بلاها أحسن بسبب ظروفها؛ ست مستحملة جوزها المختلف عنها عشان ولادها أو لأسباب أقتصادية بحتة أو حتى أسباب أجتماعية لأن مش الكل لديه الشجاعة لأعلان الأنفصال فتيجى النقطة في الحالة دى تعبير عن اليأس أو الأستسلام ورفع الراية البيضا بشكل محتفظ للحياة بأطارها الخارجى فقط لكن كل اللي جواها ماشيين في طرق متوازية عاجزة عن التقاطع في نقطة.
زى ما النقطة ممكن تكون نهاية فهى ممكن تكون بداية ؛ بداية لحياة جديدة مختلفة بكل اللي فيها يعيد بها الأنسان ترتيب حياته وأولوياته ووجود الأشخاص فيها ؛ ممكن تكون أنطلاقة ترفع من مستوى الأنسان اللي نفسه كانت بتحتل المركز الأخير في حياته لأنه بيبدى أولاده وبيته وزوجه علشان يدخل السباق وينافس ويحتل المركز الأول.
للنقطة أهمية كبيرة جدا في حياتنا لكن الأهم أننا نعرف أمتى نحطها لا نتأخر في أتخاذ القرار ولا نتسرع من غير ما نحاول في حياتنا مرة واتنين وتلاتة ؛ومن المهم أوى أننا نعرف مع مين نحطها مع كل اللي بيمثل طاقة سلبية ؛مع كل اللي بينتقدنا من غير وجه حق وكل قلبه كره مش محبة لأنه قاصد يحطمنا؛ مع كل حاجة بندمنها من سجاير وكحول ومخدرات بتكتب نهايتنا هى أقوى منا فهى اللي بتحط لنا نقطة تنهى بها حياتنا؛ مع كل حاجة عن ربنا بتبعدنا؛ مع كل شيء بيقلل من قيمتنا ومش بيحترمنا؛ لازم ساعتها تكون لنا وقفة نقول فيها كفاية؛أستوووب؛ نقطة؛ ومش هنبتدى بعدها السطر تانى.
