بقلم: مها نور
الحب كلمة جميلة كلها احساس وحنية ورقة بس ياتري احنا بنعرف نحب وايه هو الحب من منظور كل واحد فينا
الحب كلمة جميلة كلها احساس وحنية ورقة بس ياتري احنا بنعرف نحب وايه هو الحب من منظور كل واحد فينا
في انسان ممكن يختزل الحب في هدية غالية
وانسان يعبر عن حبة بكلمة مفعولها بيخلص بعد ثانية
وانسان بلمسة ايد وبوسة علي الجبين كلها حنية
طيب تفتكرو هو دا الحب لو كل ده اتوجد حقيقي هنحس بطعم الحب مين فيكو يقولي ايه هو الحب
أنا هقولكم من واقع تجربتي الصغيرة في الحياة زمان اوي كتتتير كنت اتخانق مع زوجي لانه مبيقوليش كلمة بحبك نزعل ونتخانق ويفضل يفهمني ان الحب مش كلمة ،الحب مواقف وحنية وجدعنة مكنتش مصدقة ،وفي يوم الدنيا ادتني ضهرها كسرتني وقتها هاجمني صديقي اللدود (السرطان) ماسابش فيا لا ضحكة ولا صحة ولا حتي جمال الدنيا اسودت واترعبت وفكرت معقول هيسيبني هيستحملني هيرضي بيا وانا أنثي في البطاقة بصلاحية منتهية ، وجه شاحب شعر عاطب انسانة متهالكة بصيت في يوم في مرايتي شفت ادامي شبح لأنثي بصيت في عيونه وقلتله أنا بموت وفي عنيك انتهيت خدني في حضنة وقال
أنتي ملكة وفي عيوني أجمل ملاك حبيت وقبلك عمري ما هويت وبعدك هكون انتهيت ومن اليوم ده حياتي بقا ليها طعم تاني وعرفت يعني ايه حب الحب مش كلمة ولا ضحكة ولا لمسة بيروح طعمها زي قطعة السكر اول ماتدوب بتنتهي حلاوتها
الحب قوة وضهر تتسند عليه مهما حملت عليه يفضل ثابت قوي ميخذلكش ميزلكش ميوجعكش يبنيك ميهدمكش أنا من غيرشريك عمري ووقفته جنبي عمري ما كنت هكون (مها نور محاربة السرطان الكاتبة والصحفية) اللي بطلت تتخانق عشان تسمع كلمة بحبك عشان الحب مش كلمة من حرفين الحب قوة وضهر وسند بيجمعو حبيبين
