صورة أرشيفية
لعبة القدر
كانوا حالفين انهم يكونوا لبعض
اختاروا كل حاجة سوا
اختاروا مكان شقتهم … اختاروا الوانها و عفشها
اختاروا حتى اسامي ولادهم و مدرستهم
بس القدر مكانش عاوزهم سوا
فرقهم بعد حب افتكروه حب العمر
هي :- اتجوزت واحد تاني كرهته في اول حياتها
و كل يوم تفتكر اللي كان حبيبها
حست انها خيانة …. دعت ربها يزرع حب جوزها جوا قلبها
و ربنا استجاب لدعاها …. حبته بمجرد ما عرفت ان حته منه جواها
و كل يوم محبته جوا قلبها تزيد حبت رجولته … حبت شهامته … عرفت انها من غيره ناقصة كتير..
هو :- اتجوز واحدة تانية كاره فيها كل حاجة حتى اسمها
و كل يوم يفكر في حبيبته الاولى
حس انها خيانة ….دعا ربه يزرع محبة زوجته جوا قلبه
ربنا استجاب لدعاه …. حبها بمجرد ما شال ابنه منها
و كل يوم تزيد محبتها جوا قلبه .. حب حنانها و حبها ليه … حب رعايتها لولادهم ..عرف انه مينفعش يكون لغيرها …..
هي :- خلاص نسيته و جوزها حلالها بقى كل املها …. و رعاية ولادها هي سعادتها … خليتهم سعدا بحبها لابوهم ..
هو :- نسيها من زمان من ساعة ما عرف انه كما تدين تدان … اصله بقى عنده بنت يخاف عليها و عاوز يديها الامان بحبه لامها و احترامه ليها ..
لكل فراق في الدنيا اكيد ربنا ليه حكمة و شايلك الاحسن …
فاوعى تقوله يا رب ليه اصلك متعرفش غيبه ايه …
بقلم جهاد مجدي
