من هو أمير العشرى 

كتبت: هبة حسن
اللى بيدعوا لأمير العشرى وهما ميعرفوه 

لأ اعرفوه كويس علشان تدعوله أكتر لأنه حقيقى محتاج دعواتنا ..

أمير العشرى 

* وقف قدام المئات والآلاف من الناس يكلمهم عن ربنا متغلف بكلام تنمية بشرية

* أكتر حد فى حياتنا خدوم بمعنى الكلمة .. يخدم اى حد ف أى وقت ومن غير مقابل

*ياما خسر من جيبه علشان يخلص مصالح ناس ويقول ربنا بيسخرنى

* يسيب أعظم الشخصيات وأهم الاجتماعات واقوى الايفنتات ويقوم يصلى حتى لو لوحده

* كان بيشتغل ايفنتات ودورات من غير فلوس لمجرد بس ينشر علم وينفع الناس بكلامه

* عمره ما كان يهمه شهرة ولا فلوس ولا منصب رغم انه كل مايدخل مكان يبقا مدير تدريب فيه ومدير أعمال فورا لكفائته واخلاصه فى العمل

* السبحة فى ايده ومعظم صوره لابسها ف ايده ولما جبتله سبحة من الحسين يقولى يلا خدى ثواب معايا ده انتى هتاخدى حسنات ياما

*يحث أى حد على الطاعة ويجبرك عليها من غير ماتحس تلاقيك فاكر كلامه وبتعمل بيه

* يوطى على إيد أى ست كبيرة ويبوسها ويقولها ياأمى مهما كانت هى مين وقدامى شخصيا

*ميسلمش على بنات بإيده حتى لو اقرب ناس ليه لأنه بيتقى ربنا ف كل كبيرة وصغيرة .. ويبعد نفسه بذوق وشياكة

* من أبرز اعضاء فريق عيش للناس فريق خيرى ابحثوا عنه هتلاقوا انجازات كتيرة جدا وكان أول اهتمامهم ((المرضى ))

خصوصا الأطفال ودايما يقول الطفل هو بداية الحياة ف لازم يعيش

* لما قررت أكون فريق خيرى ((معا للجنة )) انا وطلابى لجأت له علشان يعرفنا بداية طريق الخير وفعلا وقفنا ع رجلنا ووجهنا صح لحد اللحظة دى كل خير عملناه أمير له نصيب فيه .

* زيارات وأعمال خيرية وكفالة أيتام وشنط رمضان وكل خير ممكن تتخيله حط تحته مليون خط بإسم أمير العشرى

* عمره ما اتأخر عن مناسبة سعيدة أو موقف صعب لحد فينا تلاقيه أول واحد من غير ماتطلبه تلاقيه

* استشارى نفسى درجة أولى احنا كمدربين لما نقع فى مشكلة نجرى عليه كأننا حالات بنتعالج عنده ويطبطب علينا بكلامه

* فى عز وجعه والله يمسح دموع العالم كلها وهو بيبتسم

* ربنا بيحبه ابتلاه بعقبات كتير تخطاها بقلب مؤمن وراض

*لما عمل عمره ووقف قدام الكعبه ودعالى .. مطلبتش منه دعاء بس لما رجع قالى قلت كل اللى نفسك تقوليه لربنا ياهبه

* فى عيد ميلادى اللى فات قالى تعالى احتفلى مع فريق عيش للناس وجايبين تورتة كبيرة وتبقا الفرحة فرحتين ..

* بيفرح كل الناس حتى لو هو محتاج للفرحة 

* أمير رجل أعمال ومخطط ومدبر لأقوى الشركات بدون عائد مادى

تحط قدامه اى ورق يرتبهولك فى لحظه ويقيم لك أى مشروع بحدسه القوى

*حذرنى من ناس كتير وفعلا كلامه كان صح 

*عرفنى بشخصيات عظيمة كلها جواها خير

*أمير هيفوق ويرجع لنا من تانى حبيت اقولكم نبذة بسيطة عن الإنسان االى بتدعوله من غير ماتعرفوه

معايا انا شخصيا ●

*وقف جنبى فى وفاة بابا ووفاة بنتى وقفة عمرى ما انساها وكان مصدر من مصادر قوتى بعد الله 

ويقولى ياعبيطة دول فى الجنة يابختك

*كان الأخ ليا ولزوجى فى كل مواقفنا فى الحلو والمر بيتصل ويبقا معانا من غير ما اطلب منه ..

اقول ايه ولا ايه ياجدع 

أمير عمل عمليتين فى منتهى الخطورة ..

وحاليا فى غيبوبة اللى طلبه بس بالاشارة انه يتوضأ علشان يصلى وهو مش مدرك بس ده كل همه ..

وانا حلمت انه واقف ع السرير بيصلى وهو ف قمة ألمه وفعلا الحلم اتحقق وطلب ده من صديقه بالإشارة 

ان دل فيدل ان قلبه متعلق بربنا فى كل لحظة حتى وهو غايب عن الوعى

أملنا أمير يفوق ويرجع لينا بالسلامة .. الايام دى بركة وخير وطاعة وسلام نستغلها بنية صافية ودعوة م القلب لأخونا أمير العشرى 

ناس كتير بتدعيله والله ماتعرف هو مين ولا عنده ايه .. تحس ان ربنا عاوز يسمع ويشوف حب كل الناس للشخص ده

أكتر كلمتين على لسانه

#الله_المستعان

#لعله_خير

شير خلى الناس تدعيله وتعرف مين هو أمير العشرى