قصيدة ( هو & هي)
هي…..
تملي عنيها مليانة بدمع كتير
وبرده حالفه ترسم جوه قلبه حياه
بتسهر جمبه تحكيله ف حاجات تفرح
ولما تسيبه بترتل عنيها ال اه
عشان حباه
بقت بتعد كل دقيقة
بيبقى فيها مش موجود
بتبحر روحها جوه حياه
آخرها جوه منه سدود
بقت بتوفر الضحكة
عشان يفرح
وفاتحة في قلبها لقلبه
200 مطرح
بقت بتشوف حياتها
في سكته هو
موافقة تشوفه مرة ضعيف
وهي تمده بالقوة
عشان حباه
بقت كل الحاجات الحلوة براها
وهو لوحده عاش جوة
وهو ……
تملي بيحكي ليها حاجات بتوجعها
ويسهر يحكي عن واحدة محبتهوش
بيفتح كل لحظة مزاد وبيبيعها
وهي يا عيني من خوفها مزعلتوش
تملي بيرمي كل حموله فوق منها
وهي موافقة تحمل نفسها تعبه
موافقة تعدي كل دقيقة ف سنينها
عشان يفرح وقطر الحزن ميقابلوش
مبتقلوش
بأن كلامه عن غيرها ده موت ليها
وإن حكاية امبارح
دموعها لسه ف عنيها
وإن الدبلة اللي كان اهداها لحبيبته
يادوب بتخش في ايديها
وإنها حتى فاهمه عنيه
ساعة ما بكلمة يلهيها
وحبه سكوت
انا الإنسان اللي بتحبه
وكل قصيدتي كت ليها
انا هو
وهي يا روحي مظلومة مع قلبي
بتدفع ليا من روحها
وانا لغيرها ببيع حبي
بتعشق فيا أنفاسي
وانا عاشق ماهوش ذنبي
