١٠ حاجات ممكن تعملهم لابنك اهم من انك تدخلة مدرسة ال ABC الدولية
كتبت : منى شوقى
١٠ حاجات ممكن تعملهم لابنك اهم من انك تدخلة مدرسة ال ABC الدولية المهلبية الي بعشروميت الف دولار :
١- وديه ال British council وال American embassy ٣ مرات في الاسبوع يمارس نشاطات ويتعلم لغة .. هيبقي بيتكلم انجليزي كويس احسن من ميس حسناء الي بتدرسله في المدرسة الدولية .. او مستر چون الي هو شغال كهربائي سليسيون في بلجراد
٢- علمه قران هاتله واحد يحفظه او يعلمه ازاي يقرا الكتاب الي هيدخلك انت شخصيا قبله الجنه
٣- خليه يمارس رياضة او يتعلم هواية بيانو .. جيتار .. رسم .. نحت .. بريك دانس .. باركور اي حاجة لما يتضايق يفكر انه يعملها ويخرج غضبه فيها
٤- قوله ” لأ ” و صمم علي موقفك .. الموضوع ده مهم قوي !! مش كل حاجة هو عايزها لازم تتجاب ومش كل حاجة انت مش عايز تجيبها لازم تشرح السبب ومش كل لما يعيط لازم يصعب عليك سيبه هيعيط شوية و بعدها هيبقي راجل
٥- علمه انه ميعليش صوته ، من غير ما انت تعلي صوتك .. بره الناس بتركب القطر بالساعات جنبهم اطفال جميع الاعمار عمرهم في التاريخ ما عيطوا ولا أريفوا و لا كانوا عايزين يرضعوا ولا زمزقوا ولا اتكرعوا .. العيب فينا احنا مش في الطفل .. هو بيسلك نفس سلوكنا احنا!
٦- متوقفش ابنك و هو بيعمل حاجة غلط عشان تذله و تكسر عينه و تقعد كل شوية تعايره وتحرجة قدام الناس لو غلط عرفة غلطه بينك وبينه .. خليك صاحبه اللي بيحبه مش ابوه اللي بيخاف منه
٧- اوعي تقول لابنك انت فاشل حتي لو هو فاشل ..اوعي تقوله انت زبالة حتي لو هو زبالة ..اوعي تقوله انت مال جسمك عامل كده ليه حتي لو هو فعلا جسمه عامل كده ليه بالذات لو صغير متهاجموش وشجعه دايما يتغير وهتلاقي دايما عند حسن ظنك
٨- متقولوش ابدا اي حاجة يعملها وانت بتعمل عكسها .. متقولوش متعليش صوتك بصوت عالي .. متقولوش متكدبش و انت كداب .. متقولوش صلي و انت مبتركعهاش خليك دايما قدوة ليه وهو هتلاقيه بيحاول يقلدك لوحده
٩- استغل اي مصيبة هو عملها عشان تقوله “متقلقش” انا فى ظهرك !! كسر كوباية؟؟ قوله يلا نشيلها بسرعة قبل ما ماما تشوفنا او العكس حسسه ان مش كل الناس ضده
١٠- ودي الاهم انك تصحي كل اليوم الفجر و تدعي في كل صلاة لولادك و متياسش و تصر و تلح في الدعاء كل يوم دي لوحدها تكفي باذن الله
