خطوات بسيطة لتنظيف البشرة دون الذهاب الى بيوتى سنتر
كتبت : ايمى العربى ” خبيرة التجميل وتصفيف الشعر :
النهاردا هنتعلم ازاى نعمل تنظيف بشرة بنفسنا من غير ما نروح بيوتى سنتر
كلنا بنبقى فاكرين اننا لما بنغسل وشنا بالصابون او الغسول بيكون كدا نضف وتمام، بس الحقيقه غير كدا، دا فب بلاااوي لسه مستخبيه. دهون بقا وجلد ميت واتربه وترسبات وعوامل الجو وغيرهم كتير.
الموضوع ف 4 خطوات بس
1_حمام البخار
2_تقشير البشرة
3_غلق المسام
4_الترطيب
نبدأ بأول خطوه بقاا اللي هي حمام البخار.
هتغلي حلة مايه و تحطهم فى طبق واسع وممكن نحط معاهم نعناع او قرفه او زيت لافندر او اي اعشاب مفيده وممكن منحطش خالص 
🙂
🙂 نحط فوطه فوق راسنا و نغطى نفسنا بيها و نقرب وشنا من الطبق بحيث يطلع البخار على وشنا كله. و معلش نستحمل بقا شويه الحراره ونحط فى المية نعناع او روز مارى
فايدة حمام البخار دا انه بيفتح مسام البشرة عشان يكون سهل تنظيف الاوساخ اللى جواها
_بيدوب الدهون اللى موجودة فى الوش و الانف
_بيطرى الجلد الميت عشان يهيأ البشرة لمرحلة التقشير
الخطوه التانيه اللي هي التقشير :
دى بنعملها عشان نقشر طبقة الجلد الميت اللى على البشرة السطحية و اللى بتكون سبب فى شكل البشرة البهتان و ان الفونديشن يجير وتحسي وشك فيه قشر كدا، ممكن نستخدم اي سكرب جاهز او نعمله ف البيت “حبة سكر ولمون وعسل وممكن زيت زتون كمان”
هندعك وشنا بالسكرب على هيئة حركات دائرية براحة كدة فى اتجاه واحد لمدة 5 دقايق بس مش جامد عشان منجرحش بشرتنا ولا براحة اوى عشان نزيل كل طبقة الجلد الميت وبعد كدا نغسل وشنا بمايه دافيه
الخطوة التالته غلق المسام :
بعد الخطوتين اللى فاتوا مسام وشنا بتكون لسه مفتوحه ولو سبناها كدا يبقى عملنا تنظيف على الفاضي لأن بمجرد ما نسيبها للجو كل الاتربة و الاوساخ هتدخل جوة المسام تانى عشان كدا لازم نقفل المسام بعد ما نضفناها و بنعمل كدا بالتونر ولو مش عندك تونر ممكن تعملي تونر طبيعي عباره عن مكعبات تلج مية ورد وناخد مكعب ونلفه ف حاجه قطن نضيفه او شاش ونمشيه ع بشرتنا كلها براحه عشان نقفل بيه المسام وهي نضيفه.
اخر خطوه بقاا هي الترطيب:
نحط اي كريم مرطب بتستخدميه زي نيفيا سوفت او جل صبار او زبدة شيا او زيت جوز هند
وكدا يا حلوين نبقي عملنا جلسة تنضيف وكمان ضامنين اننا بنستخدم حاجات نضيفه مش هتضر بشرتنا بعد كدا
الجلسه دي بتتعمل مره ف الاسبوع للبشره العاديه او الجافه ومرتين ف الاسبوع للبشره الدهنيه والمختلطه.
لو حد حابب يحط ماسك يحطه بعد التقشير
