لسانك حصانك ..
• مرتضى : بسم الله الرحمن الرحيم .. انت مين .. انت مين .. انت انس والا جن ؟
• القمرى:مالك خايف ليه ..يخلق من الشبه 40 .. هوة انت اللى خايف ده كل الناس خايفين علية منك وبيحذرونى انى اقابلك .. والمفروض ان انا اللى اخاف .. بس انا مش بخاف من حد .. لانى معنديش حاجة اخاف عليها .. ولا على راسى بطحة اخاف منها ..
• مرتضى: داانت نسخة منى ..دا انا هوديك فى ستين داهية .. انت جبت الشبه ده منين ..قول ياد احسن امسح بيك الارض ومش هخليك تخرج من هنا .. انت امك اسمها ايه ياد ؟
• القمرى : اهدى ياباشا وبلاش تغلط .. وخالى بالك السى دى بتاعتك معايا ..خليك حلو وتعالى نتكلم فى الاهم
• مرتضى : هنتكلم فى ايه .. بعد كل اللى عملته ده ..دا انت ايامك هتبقى سودة .. مين يابنى اللى قالك تبقى شبهى انا مفيش حد يقدر يبقى شبهى ..اه .. وعلى كل .. ابدا الحوار !!
• القمرى: انت اكتر واحد يثار حولك جدل كبير نظرا لانك بتشتم وتسب عمال على بطال .. انا عايزك ترد باجابة مختصرة على الكلام اللى بيتقال عنك ؟
• مرتضى : وبيقوله ايه ياسى شبهى ؟
• القمرى : بيقوله انك لسانك طويل وبتغلط كتير .. ؟ وبتقول الفاظ جارحة ؟؟
• مرتضى: شوف ..انا مابيعجبنيش الحال المايل .. الوحش بقوله انت وحش فى وشه ..مابخافش من حد .. وفيه ناس واطية تستحق الشتيمة والضرب بالجزمة كمان
• القمرى:انت تقصد الفشلة والحرامية والمتسلقين ..وكمان الاخوان والعيال بتوع 6 ابريل والاعلاميين الخونة .. والمسهوكة والعيال بتوع السبوبة والنشطاء وحمدين صباحى وشلته وابراهيم عيسى وشلته وممدوح حمزة وشلته وابو تريكة وشلته والشيخ حسان وشلته ؟ مش كدة برضه ؟
• مرتضى : الله ينور عليك .. ماانت فاهم اهه .. طيب بزمتك لو انت مكانى هتعمل ايه مع الاشكال الوسخة دى ؟
• القمرى : والله ليك حق ..لو انا مكانك المهم كلهم واحطهم فى صندوق زبالة واولع فيهم ..
• مرتضى : هات لى حد انا اختلفت معاه وطلع كويس ياسى قمرى ؟ هات لى حد محترم انا شتمته ؟ هات لى حد وطنى وبيحب بلده وغلط فيه ؟ هات لى حد ناجح ومحترم وشاطر وشتمته ؟ انا ياباشا باشتم الناس الواطية بس .. مبعرفش امسك نفسى قدام الاشكال دى !!
• القمرى : بس برضه الناس بتقول ان لسانك طويل قوى .. وفيه ناس بتحبك بس بيزعلوا لما بتشتم ياباشا ؟ ماتحاول تبطل الالفاظ دى ؟
• مرتضى : انا عايزك تجاوبنى بمنتهى الصراحة : عمرك شوفتنى بخون بلدى ؟ عمرك شوفتنى او سمعت عنى انى بالعب مع امريكا والا مع الاخوان ؟ عمرك سمعت عنى انى من الطابور الخامس ؟ هل قدرت امريكا تستقطبنى ضد بلدى زى العيال الوسخة بتوع الاعلام ؟ عمرك سمعت عنى انى ظلمت حد ؟ ياباشا انا بتعامل مع شوية لصوص وخونة ماينفعش تبقى طيب معاهم .. دول حيتان !! دول واكلين البلد وبايعينها !!
• القمرى : انا شخصيا باحترم فيك كدة بس انت بتضيع حقك بالالفاظ الخارجة وانت عارف اعلام العار قاعد مستنى لك على غلطة ؟ لكن ممكن اسالك .. هوة انت يعنى اللى راجل مثالى ..معندكش بلاوى زى كل الناس ؟
• مرتضى : ياسيدى لو عندى بلاوى الراجل يطلعها ؟ انا مش خايف من حاجة ..اللى عنده حاجة ماسكها علية يقول !!
• القمرى: لاانكر انك ناجح ونجحت مع الزمالك .. واختلفت كتير مع لاعبين كتير رغم كفائتهم بس اثبتت الايام انك على حق .. بس عيبك لسانك ؟ دايما لسانك بيحطك فى مواقف .. والناس مش فاهمة ان اللى لسانه طويل قلبه طيب
• مرتضى : ياباشا ماانت عندك اعلام العار عمال ياكل فى دماغ الشباب والناس البسيطة وبينشروا الملابس الوسخة للبلد ماحدش بيقول عليهم حاجة ليه ؟ سايبين الخونة وماسكين فية انا علشان لسانى طويل وباشتم ؟ يعنى اللى بيشتم والا اللى بيخون بلده ؟
• القمرى : والله ليك حق انا معاك .. بس همة رفعوا الحصانة عنك ليه فى مجلس الشعب ؟
• مرتضى : هههههه .. ياراجل ده نص مجلس الشعب وانت عارف اكتر منى .. فشلة وداخلين بفلوسهم ولا فاهمين حاجة .. خايفين منى احسن افضحهم وافضح بلاويهم .. بس انا مش هسيبك تخرج من هنا !! انت جاى من طرف مين ياد ؟ومين اللى زقك علية ؟
• القمرى: اخس عليك هتقبض علية فى مكتبك ؟ كل ده علشان شبهك ؟ هتعمل فية ايه ياسيادة المستشار داانت سى ديهاتك معايا؟
• مرتضى: والله ماانت خارج من هنا الا لما نتغدى مع بعض .. هاكلك اكلة انما ايه .. اكلة بنت ستين كلب !!!
• القمرى : هههههه .. مفيش فايدة فيك حتى الاكل بتشتمه !!!
