صرخة وجع

صرخة وجع
طالعه من القلب بنارها
صرخة وجع
تكوي جدار القلب و تزلزل الروح
راح الجدع
و ساب الأم لوحدها في دارها
تبكي ألم
و مش قادره تتحمل جروووح
بتقول له يا ولدي ليه رحت و سبتني
و تقول يا ريت يا رب كنت سبته و خدتني
أنا بعده في الدنيا دي مالي عيش

يا ولدي كان منايا أفرح بعرسك
و أشوف عروستك يوم في الكوشه جنبك
و كان كل رعبي ان اليوم ده ما يجيش

و لو حبكي عمري عليك ما تخلصش الدموع
و مهما حزنت يا قلبي مفيش رجوووووووع

راح الجدع
قلبي اتخلع
لما الخبر جاني
شايفاك أنا
نور في السما
ماليلي وجداني

شايفك أنا يمه و سامع صوتك
على عيني يمه الوجع اللي سكن فيكي
مانا كان لازم أكون راجل و اصون الأرض
و بدمي و روحي يمه افديها و افديكي

بلدي اللي خيرها عليا و على الكل
بلدي اللي كايده العدا و عليها مليون عين
بلد الشهامه و الطيبه بلد الأصاله
بلدي الجميله قوليلي نلقى زيها فين

بلدنا يمه فداها أرواحنا و دمانا ………

نام يا حبيبي في ترابها قرير العين
و نتقابل سوا في الجنه يا ضي العين
لا في نصب و لا تعب و لا قلب يبات حزين
آمين

#إخلاص_عبد_المحسن

#مجلة_سحر_الحياه