تجاعيد الوش
بقلم : إخلاص عبد المحسن
تجاعيد الوش ساعات بتغش
و توهمنا بعمر طويل عدى
تجاعيد الوش أكيد رسمت
حكايات الزمن اللي سرقنا
تجاعيد الوش مع البسمه
رسمت رسمه
حلفت أيامي ما تمحيها
علشان كل اما عيني تشوفها
تمسح خوفها
و تعيد أيامها و لياليها
بإيديها تلملم و تطبطب
تمسحلي الدمع اللي اتكبكب
و تفكر بس في بسمتها
اللي رسمتها
تجاعيد الوش
تجاعيد الوش كمان م الحزن ساعات تيجي
و الحزن يزود تنهيدي
و مهما حياتي كانت قاسيه
أنا عمري ما كنت في يوم ناسيه
أوقاتها في لحظة ما اترسمت
تجاعيد الوش
يمكن تجاعيدنا تكبرنا
و تفكرنا
إننا لو مهما اتأخرنا
للعمر نهايه أكيد جايه
في معاد مكتوب
مش عاوزه امحيكي يا تجاعيدي
يا زاينه الوش
أنا أصلا عايشه على طبيعتي
لا بحب الزيف
و لا احب الغش
