بريد القراء أعداد: هويدا صابر
أيه دا هي عامله كده ليه ، لا لا شوفتي لابسه أيه يعني هي فقيره مش عارفه تلبس فستان عدل ، الفرح دا ماله كده لا أكل عدل ولا العروسه حلوه مش كان العريس خد فلانه أحسن ، أوبا هي فلانه وصلت دا أحنا هنتسلي النهادره ….ألخ. أستوب بقي لحد كده أصل الكلام دا مبيخلصش ، نقطه ومن أول السطر.
أحنا نسينا أن في لحظه ممكن نفارق الحياه ، أصل الموت مش بعيد عننا ، وأحيانا بيجي من غير مقدمات فجأه ، عشان كده دايما بنستعيذ من الموت المفجأ وأن ربنا يرزقنا حسن الخاتمه ، لأن العبره بالخواتيم زي مابيقولوا.
ودي قصة للعبره بترويها لينا الأستاذه خ ع:
دي قصة حقيقيه لأختي الله يرحمها ويحسن إليها ، كانت متزوجه وعندها ولد وبنت وزوجها كان رجل ثري مش حارمهم من أي حاجه في الدنيا كل طلبتهم أوامر ومفيش في حياته غيرهم ، عيبها الوحيد الله يرحمها أنها كانت بتحب قعدات الرغي لدرجة أنها بتعمل عزايم مخصوصه لصاحبتها عشان يقعدوا يتكلموا مع بعض علي الناس نظام ها هنتكلم علي مين النهارده ، لحد محصلت المصيبه الكبيره أبنها شاب 23 سنة أتوفي نتيجة جرعة مخدرات زياده ، حصلها صدمه عصبيه وكانت حاسه بالذنب وأنها السبب في أللي حصل لأبنها الله يرحمه ، لأنها كانت مشغوله عنه وعن زوجها وبنتها وبيتها بالقعدات دي ، ولما فاقت من صدمتها شويه أستغفرت ربنا وقفلت علي نفسها وبيتها وحوطت علي زوجها وبنتها وأتقربت لربنا جدا وبعدت عن صحباتها وكل الناس اللي كانت بتشجعها وبتقعد معاها ، وبعد 3 سنين ماتت فجأه وهي علي سجادة الصلاه ساجده كل الناس بتقول سبحان ، الله سبحان مغير الأحوال وربنا يحسن ختامنا جميعا ، أنا طبعا مفتقده أخت وصديقه ليه ، لكن أعتبريها رساله لكتير مننا الأنشغال بالكلام علي فلان وفلانه مش هيجني غير كل حسره وألم ، وأختي الله يرحمها فهمت الرساله بموت أبنها وغيرت حياتها ، والحمدلله علي كل حال.
——————أختي الكريمة: في البدايه أحب أشكرك جدا علي قصتك وهي فعلا عبره وموعظه ، وأضافه لقصتك في وقعه حصلت معايه شخصيا كنت أنا وأتنين زميلات ليه في واقفين قبل الشغل في الدور الأول فواحده منهم أبتدت تتكلم علي زميله مش موجوده معانا بطريقه مشينه وبالباطل ، قولنلها ليه كده حرام عليكي ردت علينا هي تستاهل أني أقول عليها الكلام دا لأنها كذا.. ، سبحان الله مشينا وسيبناها أنا وزميلتي وطالعين الدور التاني وأحنا داخلين للمكتب أللي فيه شغلنا أتفجأنا أن الموجودين بيتكلموا عن البنت أللي كانت بتتكلم تحت من دقايق قليله علي زميلتنا الغايبه بكلام شبه أللي خرج من لسانها علي زميلتها أللي أتكلمت عليها في ضهرها ، أنا كان كل تفكيري أن سبحان الله نفس الكلام أتردلها في وقتها هي بتتكلم في الدور الأول علي غيرها ، وغيرها في الدور أللي فوقها بيتكلم عليها الفاصل بينها وبينهم السقف ، أصل ربنا أستحاله هيسيب ، أما أختك رحمة الله عليها فهمت الرساله زي مقولتي وفاقت لحياتها وبعدت عن قعدات الرغي والنميمة وقولنا وقالوا ، لكن في غيرها مستمر في دا مش لازم تحصلك مصيبه في حياتك عشان تتغير ، أعمل وقفه مع نفسك وأبدأ من جديد وأبعد عن أي قعدات فيها كلام عن الغير ، وكمان بلاش تسمح لنفسك أن تقف تسمع حد وهو بيتكلم علي غيرك لأنه بكره هيتكلم عليك في ضهرك ، والمصيبه الأكبر أن أحيانا في ناس الغل والكره والغيره يخليها تختلق كلام غير حقيقي علي البعض ويقوله في القعدات فرصه من جهه لزوم التسليه ونظام هنقطع في فروة مين النهاردة ؟ ومن جهه تانيه طلعت الغل والكره وخليت الناس تتكلم عليه ، دا في كلام للأسف خرب بيوت ودمر حياة ناس وسمعتها ، لأن في القعدات دي طبعا الكلام بدل ميكون بين أربعه أو خمسه هتخلص القعده والأربعه خمسه هيقولوا لأربعه خمسه غيرهم وهكذا ، ولا بيتعرف الكلام بدأ منين وهيقف أمتي وعند مين ، وبعدين أيه العائد عليك من دا كله غير أنه هيتردلك في يوم من الأيام أكيد ، ربك يمهل ولا يهمل ، يارب نستهدي بالله جميعا وكل واحد ليه في الرغي وقعدات النميمه بيكون عارف أنه كده ، أستوب وألحق نفسك ، وربنا يهدينا ويصلح لينا الاحوال جميعا.
