لسه الدنيا بخير
بريد القراء أعداد هويدا صابر
لسه الدنيا بخير مش مجرد كلام بيتقال وخلاص لا هي فعلا كده ، لأن لو الخير خلص من الدنيا نقول عليها يا رحمن يارحيم..
ودي قصة من الأستاذة ل س:
أنا لما بخرج من شغلي بتكون الساعه 6 بليل وبكون صاحيه من بدري مش شايفه قدامي وأنا نازله من عربية الشغل علي الدائري كنت حاطه الموبايل علي رجلي وقع علي الأرض مشيت شويه ووقفت أدور علي الموبايل في الشنطه مافيش أرن عليه من الموبايل التاني محدش بيرد أتصلت بزميلي يدور عليه في عربية الشغل قالي مافيش ورن علي رقمي 3 مرات في رابع مره رد عليه رجل قاله الموبايل معايه لقيته وأنا في المكان الفلاني ، أتصل بيه زميلي وقالي في واحد رد وأنا رجعلك دلوقتي نروح نجيبه مش هسيبك لوحدك ، رجعلي ووقف تاكسي يوصلنا التاكس عند مكان معين قالنا لا كملوا بتوكتوك الحته دي مش أمان ومش هدخل هنا ، نزلت أنا وزميلي وهو أللي حاسب التاكس ورفض ياخد مني أجرته وقالي عيب أنتي زي أختي وقالي للأمان أرجعك وأجي أنا لوحدي قولتله لا معاك ، وصلنا للرجل مستني وأدي زميلي الموبايل ورفض ياخد مننا فلوس دي أمانه يعني أنا غلطان أنتوا كده بتشتموني وطلع عامل بسيط جدا ووصلنا لحد الطريق العمومي بتوكتوك هو أللي حاسب عليه ، الموبايل دا تمنه 4500 جنيه كان ممكن باعه أو أتصرف فيه لكنه رد الأمانه لصاحبها ، لما رجعت البيت قولت صحيح الدنيا لسه بخير وفيها ناس عندها أخلاق ومبادئ وضمير رغم أنها بسيطة ومحتاجه للجنيه..
أختي الكريمة:
أنا كنت في مكان وأنا بدفع الفاتوره أديته فلوس زياده ردها بشكره قالي دا واجبي ، في قصة تانيه لسيده ركبت تاكسي نسيت شنطتها من كتر تعبها وفيها 5000 جنيه السواق فتح الشنطة ودور علي أي شئ يوصله ليها ووصلها من عنوان بطاقتها وشايف الفلوس قدام عنيه ، وشوفت بنت بترجع زجاجة زيت للسوبر ماركت وبتقوله دي زيادة جاتلي غلط ، والنمااااااذج كتيره ووراها ناس جميلة بتأكدلنا أن الدنيا لسه بخير ، عشان لما نقابل النماذج السيئة نقول الحمدلله ، وتجربتك مع رجل بسيط وهيئته تدل أنه محتاج للفلوس ومع ذلك مستغلش الموقف وأخد الموبايل هو دا الضمير لقي شئ ومحدش شايفه غير ربنا فخاف منه ورد الأمانه وأللي زي الرجل دا أغنياء بكرامتهم وعزة نفسهم سواء معاه فلوس أو لا وربنا يكتر من النماذج دي في زمانا دا ، ويحفظنا جميعاً من أي لحظة ضعف في أي شئ لأن وقتها هنخسر نفسنا وأخلاقنا.
