عانس بمزااااجي ..
بقلم : نشوي محمد مظهر
اخصائية الارشاد الاسري والتربوي
سمعنا كتير عن طنط حشريه وسؤالها المشهور
هنفرح بيكى امتى يا حبيبتي ؟
وامتي هنشرب شرباتك يا عروسه ؟
ولاقينا بناتنا العسل بخفة دمهم بيردوا كمان وبيسالوا هانشرب قهوتك امتى ياطنط؟
حوارات وايفهات بنشوفها وبنسمعها بتداري وجع او هروب من السؤال او موقف محرج بتتعرض ليه بنات كتير لسه متجوزتش .
اللي للاسف المجتمع اطلق عليهم مصطلحات والقاب كتير ومنها ..
( لقب عانس ) وكان تأخرها في الزواج بقى عيب وجريمه .
والاغرب انها بتتحاسب عليها .
ايه الفكره اني اطلق مسميات لبنت لسه رزقها في الزواج مجاش.
او حتى بتفكر في اهتمامات تانيه غير الارتباط او منتظره الشخص المناسب و مش فارق معاها هاتستني قد ايه المهم انها تعيش صح مع الشخص اللي ترتاح معاه ..
ليه اجبرنا بنات كتير على الزواج من اشخاص غير مناسبين خوف وهروب لتكون من اصحاب الالقاب المزعجه دي ..
الزواج مسئوليه ولازم تكون قدها وهي الوحيده اللي تحدد تقدر تشيل المسؤوليه ولا لاء .
يبقى من حقها تختار الوقت المناسب ليها هي حسب امكانيتها واحتياجتها وقبلهم ارادتها بجد واستقبالها للموضوع.
الجواز مش زفه وطرحه ولا ليله جميله في قاعه ولا فرش وعفش ولا شهر عسل وبس .
الجواز قرار فعلا محتاج تخطيط وشويه اسئله لازم تجاوب عليها اي بنت قبل ما تفكر في الارتباط ….
اولها: ايه هدفك اساسا من الزواج ؟
سؤال اجابته تختلف على حسب ظروف كل واحده وطريقه تفكيرها واحتياجاتها بس الاكيد انها لازم يكون هدفها واضح من الاول.
ثاني سؤال : هل انت جاهز فعلا للارتباط وازاي تعرفي انك مستعده ؟
بمعنى بتفكري بلغه ايه انا ام نحن !!
يعني وانتي بتفكري في المستقبل ومخططه ليه فكرتي انك ممكن يكون جوزك فيه ومشاركك والا لاء..
للاسف بنشوف بنات كتير عندها خطط و مهمات بتقع منها لانها ببساطه دخلت في دائره الزواج و الاولاد من غير ما تكون في الخطه مسبقاً ..
سؤال اخر : هل انت نضجتي فعلا ولا لسه عقلك طفولي؟
يعني الوقت اللي تحسي فيه انك صغيره ودلوعه مختلف تماما عن الوقت اللي تكوني فيه زوجه مسئووله وام لاطفال بالفعل.
الجواز علاقه وحياه مستمره ويقال انه للكبار فقط يعني اولوياتك هتتغير من كونها موجه لدعم نفسك بس الى دعم زواجك واسرتك
فلازم تكوني مستعده و مش غلط ولا عيب انك تعترفي انك مش جاهزه لكده لانه مش هيفيدك حد لما تتحملي زواج من شخص انتي مش قادره تتحمل مسؤوليته .
سؤال كمان..
لازم تسألي نفسك هل شريك حياتك هو الشخص المناسب ام هناك الافضل منه ؟
طبيعي لما تختاري خطيبك او زوجك تعلمي قلبك وعقلك انه هو الشخص الافضل من وجهة نظرك وانك مش اخترتي انك تتجوزي وخلاص.
لانك هتلاقي نفسك بتابعي اشخاص ثانيه شايف انهم افضل ودايما هيكون في مقارنه وانتقاد لشخص اختارتيه لمجرد الارتباط .
وده مش معناه انك هتلاقي الشخص الكامل لان الكمال لله وحده .
انما معناه اني هاستنى الشخص المكمل ليه واللي هاقدر اكمل معاه حياتي.
ودلوقتي غيري السؤال واسألي نفسك انا عايزه اتجوز من اي شخص ولا من افضل شخص؟
و لازم تعرفي ان هناك شخص لكل شخص
وزي ما بيقولوا ..
( عندما تتفتح الزهور سياتي النحل )
واخر سؤال :
هل انتي فعلا مستعده والا اقنعتي نفسك بكده ؟
يعني هاتقدري تتحملي كل المسئوليات دي ولا اصحابي واهلي اقنعوني واصل القطار بيعدي.
ما يعدى هو مفيش غيره .
لازم يكون قلبك وعقلك متفقين ان ده الوقت المناسب اللي هتقدري تتجوزي فيه ومش هايهمك كلام الناس ولا تعليقاتهم والفاظهم .
واللي يقولك بقيتي عانس ردي وكلك فخر..
انا عانس بمزاجي.
