بقلم دعاء خفاجي
بنوتي حبيبتي
معاكي حسيت حنيني وطيبتي
يوم ميلادك كان ميلادي قلبي رفرف بين ضلوعي
صوت عياطك جه ينادي نزلت من الفرحة دموعي
حتة مني لما اشوفها ببقي طاير من السعادة
حضني مكانها وقت خوفها خلت حياتي سكر زيادة
روح قلب بابا يا اخواتي عليها
بيها مغرم صبابة وبشوف دنيتي فيها
فاكر اول خطوة لما مشيتي وانا اغني تاتا تاتا
اول سنة طلعت ليكي اول مرة اكلتي شيكولاتة
بدعي ربي يباركلي فيكي ومن عيون الناس يحميكي
ويحققلك كل احلامك ويسعدلك كل ايامك
ويرزقك بابن الحلال اللي يتقي ربنا فيكي
ويحاول علي قد ما يقدر يكون زيي في حبه ليكي
واشوفك احلي ماما واطمن اني أديت رسالتي
ووقتها هتتاكدي اكتر قد ايه بحبك يا بنتي
