ثروت بديع
أبيض واسود
وعيون حلوة ماتعرف حقد
أبيض واسود زى كلامنا
قبل زمان
يا ابيض……….. يا اسود
زى السيف……. زى الحد
لاضم الجمعة ويا السبت
ويا الحد
جوه نفوسنا مانعرف كبت
يا ابيض …………..يا اسود
كان الرد
قاطن روحنا بستان ورد
أبيض لون المى الجارى الطاهر
وسط النهر
لون المخفى لون الظاهر
ساطع زى بزوغ الفجر
أسود لون الطمى الراقد
غايب عنا من ازمان
خلف السد
أبيض….. كان
لون النبض
جوه قلوبنا الصاينة العشرة
أسمر اسود لون الجلد
لون البشرة
اسود عرق الخلق الصابرة
الكاينة هناك ورا الخزان
أبيض قلب البنت السودا
الساكنه هناك فى بلاد النوبة
تايهه وهايمة فى حب بلادها
رغم الظلم ورغم القهر
رافضة الزهد ورافضة التوبه
أبيض لون الملح الصافى
لون الحجر الناطق الدافى
إسود لون العيشه المرة
أبيض لون القلب الغاضب
هناك فى رشيد
اللى رجالها قاوموا الغاصب
بقلب حديد
ابيض واسود لون الرسم
ابيض لون ضمايرنا الكامنه
جوه الروح قبل الجسم
يا أبيض……….. يااسود
لحظة حسم
لازم ترجع زى زمان
لحظة فوقان. ساعة صحو
لازم ترجع …….أو
يبقى الموقف م الاعراب
على هذا النحو
حالة مفرد غاب
وغاب النبض
ضاع الحب
راح الشعب ………………………..فى خبر كان
مدير قسم الادب والشعر
علا السنجري
