#شعر …شريف الهمامى
لسه ياامه ف عنيا مكبرتيش
فاكر منديل شعرك وعنيكى
فاكر دعاكى ومدت ايديكى
وهى ممدودة لسابع سما
بتقول يارب خليلى ولادى
يارب نولهم الل ف بالى
فاكر وانتى بتزوقى يدوب
برجلك باب الصبح
تقومى تعجنى
وتغسلى
فى طشطك كل الاحزان
تملى الدنيا بضحكه جنان
تغنى صوتك يخلى النخل يطاطى
اسرح فيكى أنسى كل الماضى
لجل شايف فيكى بكره الل جى
وانتى لسه متعبتيش
ومازهقتيش
فمتخافيش
علشان لسه ياامه
انتى فى عنيا مكبرتيش….
