بريد القراء أعداد: هويدا صابر.
الحب أساس كل شئ في حياتنا ، ولو أنت مش حابب طريق لأي سبب بعد ممشيت فيه أوعي تكمله ، زي الجواز لو مفيش رضا وقبول وراحه بين الطرفين هيحصل في العلاقه دي خلل وهتكون غير سويه.
دي مشكلة السائلة: م م.
أنا أنسه عندي 244 سنه كنت بحب زميلي في الجامعه جدا وهو كان بيحبني لكن ظروفه الماديه كانت صعبه أوي ، وعشان كان خايف عليه أن عمري يضيع جنبه قالي لو أموري أتظبطت أول حاجه هعملها هتقدملك وأنقطعت علاقتنا علي كده ، بعد 6 شهور أتقدملي أخو صاحبتي ماما وخالاتي وكل قرايبي قالولي دا مبسوط ومؤدب وهتعيشي عيشه مرتاحه فوافقي ، وافقت وعملنا الخطوبه بس بأمانه أنا محبتوش ولا هو أتصرف أي تصرف يخليني أحبه لبسه مبهدل وطريقة كلامه مبحبهاش وكتير بحس أني مكسوفه وأنا معاه من تصرفاته ، وكل متكلم يقولولي أنتي تقدري تغيريه ، وعدي شهرين ولا أتغير ولا أنا عارفه أحبه ومش عايزه أكمل معاه ، وبدعي ربنا ليل نهار أنه يساعدني ومكونش مفتريه عليه زي ماما والكل مبيقولي ، وفجأه زميلي في الجامعه كلمني أشتغل وأموره هتتظبط وعايز يجي يخطبني ومامته كلمتني ، وأنا قولتله أني أتخطبت قالي أنا عارف انك بتحبيني وأنا والله أموري هتكون كلها تمام وهنبدأ مع بعض واحده واحده وربنا هيكرمنا ، أنا دلوقتي عايزه أفسخ الخطوبه أولا عشان محبتوش وثانيا عشان عايزه أكمل حياتي مع الأنسان أللي حبيته وحبني ، أنا كده غلطانه ومفتريه؟
——————–
السائلة الكريمة: أولا أنهي موضوع أرتباطك فورا ورجعي ليه شبكته وأي هديه جابهالك مع أي حد من أقرايبك ويعتذرله بطريقه لطيفه ، لأنك لوكملتي مع خطيبك هتظلميه معاكي وأنتي مش غلطانه ولا مفتريه دي مشاعر وجواز لازم يكون علي أساس قوي لأنكم هتعيشوا مع بعض علي الحلوه والمره ، لو مفيش حب جواكي للأنسان دا أستحاله حياتكم هتكون سويه وهيكون كلها مشاكل ومن رابع المستحيلات هتتحمليه ، والصراحه في المواقف دي أفضل ومامتك وأهلك لازم يقتنعوا أن أنفصالك دلوقتي هو الصالح ليكي ولخطيبك ، وبالنسبه لزميلك في الجامعه مادام بتحبيه وبيحبك يتقدم لأهلك ويارب يكون فيه الخير ليكي.
