أحسنوا تربيه أولادكم

بقلم. نادية إسماعيل

تربيه الاطفال من أهم أسباب النجاح فى الحياه يعنى ايه يعنى دى الأساس لأى بناء اساس مهم جدا بس مش كل اساس بيكون كويس فى اساس صح وفى اساس غلط وهنا هنعرف ايه الفرق ما بينهم و نتيجه كل اساس فيهم .

الطفل ده زى الزرعه لو زرعتى صح هتحصدى صح 

ولو زرعتى غلط حصادك مش هيبقى لي اى لازمه 

التربيه فن انا بشوف ان الطفل ده عامل زى العجينه وانتى اللى بتشكليها بطريقتك يعنى انتى المتحكمة مش هو الحقيقه ان انا بشوف مهازل فى تربيه الاطفال الموضوع اتعكس تماما بدل ما احنا اللى نربيهم هما اللى بيربونا ويتحكموا فينا ايه التهريج ده يعنى ايه يحكم رأيه فى حاجه وانا اوافق بكل سهوله وسلبيه يعنى ايه يزعق فيكى ويمد ايده عليكى وانتى بكل برود تضحكى يا سلام انتى شايفه كدا صح خدى بالك ان بكره هيجى وقت عليه يزعق و يضرب ويشتم وبالنسباله ده طبيعى لأن انتى ربتيه على كدا فمترجعيش تعيطى وتقولى ابنى او بنتى بيعقونى وبيتطاولوا عليا و بيتجاوزوا حدودهم لا قبل متلوميهم لومى نفسك الاول نيجى بقا نتكلم فى نقطه الأكل الامهات اللى بتحب تعطى طفلها القطع الكبيره ازاى يعنى ده بدل متعودى على القناعه يعنى ايه طفل يأكل ربع فرخه ايه التهريج ده امال الكبير ياكل ايه فرخه كامله طبعا بكل سلبيه هتردى وتقوليلى انا بشبعه ومش بحب احرمه من حاجه والله انتى مصدقه اللى انتى بتقوليه على فكره ده مش مقياس خالص حرمان ايه وشبع ايه اللى يخلق طفل طماع وعينه فارغه انتى بدمريه وانتى فاكره انك كدا بتحبيه

اكليه بس بالعقل والادب لما تعطيه حاجه تعطيه حاجه واحده وفى ايد واحده مش تعطيه فى الايدين و تكون الحاجه صغيره يعنى لو هو بياكل ربع فرخه مثلا يبقى يأكلها على مرحلتين عشان تربى فيه القناعه وتخلى عينيه مليانه وعشان لما تخرجى فى مكان او عند حد متحرجيش منه ومن افعاله اللى انتى السبب فيها عودى ابنك على اللى تطبخيه ياكله مش يتنك ويتأمر على الأكل مش لازم تعملى كل يوم لحوم واسماك خليها يوم ويوم او خلى يوم او يومين فى الاسبوع أكل من غير لحوم عشان يتعود ان اللى موجود ياكله وكمان عشان يحس بالناس الغلابه اللى غالبا نسيت شكل اللحوم ربى ابنك صح عشان يدعيلك لما يكبر بدل ما يدعى عليكى ومش كل حاجه ابنك يطلبها تتنفذ فورا والله ده اكبر غلط انتى بتنشئ طفل انانى و عديم المسئوليه بكل المقاييس ربى ابنك وعوديه على ان فى حاجات نقدر نوفرها وحاجات منقدرش نوفرها فى الوقت الحالى وحاجات من الصعب توفرها مش مجرد ميطلب طلبه يتحقق لا طبعا غلط جدا مهو محتمل ووارد جدا يجى عليكى وقت وظروف صعبه ومتقدريش توفرى ليه طلباته تقدرى تقوليله ساعتها هتعملى ايه هتستلفى مثلا ولا هتشحتى عشان توفرى احتياجات الدلوعه بتاعك

العيب مش عليه العيب عليكى انتى وعلى تربيتك الغلط ليه ما انا قولتلك ده عجينه وانتى اللى بتشكليها بطريقتك ربى ابنك على ان يعتمد على نفسه مش عليكى فى كل حاجه خليه يساعدك فى شغل البيت سواء ولد او بنت عوديهم يكونوا متعاونين فى كل حاجه عوديهم ينضفه مكان نومهم ومكان لعبهم علميهم النظام والترتيب بلاش هرجله وبلاش كلمه دول لسه صغيرين على فكره الصغير بيكبر بس الموضوع موضوع تعود مش أكتر وخدى بالك النهارده انتى بصحتك وبتخدمى اسره كامله بكره هتكبرى وصحتك هتقل وساعتها مش هتلاقى حد منهم يساعدك اه والله ما انتى اللى عملتى كدا هما ملهمش ذنب الذنب ذنبك انتى متنسيش ان من أهم اساس فى التربيه هو الدين ربى اولادك على الدين والاخلاق عشان تنشئ جيل صالح علميهم الصلاه والقرآن علميهم التقوى والاحسن علميهم يعنى ايه ام ويعنى ايه أب خدى بالك دى عجينتك وزرعتك يعنى حاولى تبدعى فيها عشان تطلع صح وتحصدى منها خير 

خلى ابنك او بنتك لم يدخله اى مكان او اى بيت يتقال يسلم اللى ربت وتعبت خلى اى حد يشوفهم يدعيلك 

عرفتوا الفرق بين اساس صح يعنى ايه يعنى جيل صالح جيل محترم ومطيع ومشرف فى اى مكان وزمان 

والاساس الغلط يعنى جيل فاسد وجيل محزن بكل المعانى 

ارتقوا فى تربيه أولادكم و اجعلوهم رمز فخر وشرف وعزه ليكم حبوا أولادكم صح ربوا أولادكم على القناعه والعطاء والتعاون والإحسان للغير والاحساس بالغير افتخروا باولادكم فى كل مكان وبتربيتهم الجميله خلى اللى يشوفهم ويشوف تربيتهم يتمنى يكون اولادهم مثلهم ربى اولادك على طاعتك وطاعه والدهم 

لو ربيتى اولادك صح يبقى انتى اساستى صح ومدام الأساس طلع مظبوط يبقى البناء هيطلع مستقيم ومحدش يقدر يهدمه مهما حصل 

أحسنوا تربيه أولادكم وربنا يقوينا جميعا على تربيتهم ويجعلهم ذريه صالحه ياااااااااااااااااارب ??