حكاية جدع …حكاها الودع
الشاعرة شيرين الرشيدي
يام الودع …شوفي الودع
واحكيلنا ايه…صاب الجدع
تاه فى السنين…موجوع حزين
والقلب من وجعه انخلع
قالت فى قلبه ورده دبل
دبحه حبيبه فوق جبل
جواه وجع هد الجبال
حابس دموعه عز الرجال
بالحزن معمله عمله
وقته مع القمر اكتمل
وحله الوحيد…يسافر بعيد
وفى عيون صبيه يدوب غزل
لو قلبه دق…سحره انفلق
وحزنه فى البحر غرق
لازم يثور…ويشق نور
ينسى الضلام …ينبنى الجسور
جواه ظلام ..والحب نور
نور بيهدم اعلى سور
وده التمام…خلص الكلام
وكله من قلب الودع
