مين فيكوا (عصبي)

بقلم دعاء مصطفي

مين فيكوا (عصبي)

ناس كتير سألتني هل في حل لموضوع العصبيه 

فأنا هنا النهارده هسألكم سؤال …ما قعدتش تفكر مره 

وسألت نفسك انا ليه عصبي ..؟.او انا ليه بقيت عصبي .؟

او انا ما كنتش كده مش عارف اتغيرت ليه.؟ دي كلها اسأله 

بس ليها كذا سبب حابه اقوله …..

اول سبب هو 《 الخوف》 أو 《التهديد》 بشكل عام وبشكل يخصنا احنا محاربين السرطان ففي ناس معانا من وقت ما اصيبت بالسرطان وهي خايفه كلمه سرطان كلمه مخيفه بالنسبه لينا كلنا كلمه تخليك خايف وقلقان بتحطك تحت ضغط رهيب وتهديد بالنسبه لجسمك وبالنسبه لوضعك الاجتماعي بتفكري كتيير بعيلتك اولادك حياتك بتفكري بالناس اللي حواليكي هيقولوا ايه بيبصولي ازاي هل بنظره الشفقه ولا الحب ولا ايه ….؟ 

كتير مننا بيواجه مشاكل مع اصابته بالمرض 

لو انتي متجوزه يبقى جوزك هيقول ايه او هيعمل ايه معايا ايه رد فعله هيقف جنبي ولا يتخلى عني …دي كلها ضغوط بتخليكي عصبيه 

ولو انت شخص ليك اصدقاء ومعارف يبقى اصحابي هيعملوا ايه هيفضلوا اصحابي ولا يبعدوا عني ….؟

وبرضوا فيه كتير الاصحاب اختاروا البعد ولو موجودين بيبقوا ضغط عليك…

غير ده وده الضغط المالي لان علاج السرطان مكلف جدا وغالي ومهما كانت حالتك الماديه كويسه مش هتقدر تسد مصاريفه…….

ده طبعا غير الاعراض الجانبيه للعلاج الكيماوي أو الهرموني او حتى المسكنات او اعراض المرض نفسه لانه مؤلم ..مؤلم نفسيا ..ومؤلم جسديا ….

من اسباب العصبيه كمان هو 《الشك》انك تكون شاكك في علاجك شاكك هتخف ولا لأ…شاكك في مستقبلك هتكمل ازاي حياتك وشغلك وفي بيتك مع عيالك …..

دي كلها الحقيقه من اسباب العصبيه.

طيب غالبا كده احنا عرفنا أسباب العصبيه ومافيش حد هيقرا كلامي إلا وأكيد هيكون عنده سبب من الاسباب دي ……

ضغط في شغلك …..ضغط في حياتك الاسريه …..ضغط في جسمك بسبب مرضك او مرض حد من اسرتك ….في ضغوط كتيير للعصبيه..

طيب هل في علاج للعصبيه ……في الحقيقه لو العصبيه من ضمن الأسباباالي ذكرتها فممكن من خلال شويه أفكار نتجاوز 

مشكله العصبيه :-

# أول حاجه انك تؤمن وتحمد ربنا على اللي انت فيه …مش بس كلمه الحمدلله على لسانا وخلاص ..تسمع قرآن وعلى فكره دايما ربنا بيبعتلك رسايل بتلمسك وقتها وتلاقيك حتى وانت ماشي في الشارع تسمعها بالصدفه او تقراها في مكان تلاقيك وانت مثلا في الموصلات تسمعها أكن رربنا بيطبطب عليك وبيداويك بآياته وكلامه وبتحصل اكيد ليكوا ..

*تاني حاجه لو انت متعصب من موقف معين يعني حاجه وقتيه تستعيذ بالله من الشيطان قول دايما لا حول ولا قوه إلا بالله بتهدي جدا وعن تجربه ولو انت في مكان امشي منه ولو قاعد قوم اقف والعكس ….ممكن تاخد شاور او تغسل وشك …اي حاجه تهديك ..

*في طريقه تانيه الصراحه انا بعملها ايه هي ….*الكتابه* بفرغ طاقتي كلها في الكتابه بكتب كل انفعالاتي مواقفي في الحياه مشاعري او حتى فكره في دماغي بطلعها الكلام ده لو حلو او وحش المهم تطلع اللي عندك…..

* فيه فكره تانيه والصراحه ممكن تضحكوا عليها فاكرين الفيلم لما الراجل القصير راح لدكتور نفسلني وقاله انه متضايقمن قصره والدكتور رد عليه وقاله ردد دايما كلمه (انا مش قصير ازعه انا طويل واهبل) احنا هنعمل زيه بالضبط هنقول في وقت العصبيه او غيرها (انا مش عصبي انا هادي ) (انا مش عصبيه انا هاديه )

كذا مره ده برضوا هيخفف من العصبيه ..

*ابعدوا عن اي شخص او حاولوا انكوا تبعدوا عن اي شىء او شخص بيسبب في توترك وعصبيتك لو حتى بالمواقف ….اتجنبوهم .

*حاجه طبعا مستحيل تنساها الا وهي الدعاء وفي ادعيه كتيره الصراحه جديده” في برضوا قياام الليل بيهدي جدا حتى لو ركعتين.

جديده

* اعملواحاجه بتحبوها حتى لو كانت أكله أو خروجه أو حاجه تشربوها حتى لو كانت حاجه ساقعه.

*آخر حاجه ودي الاهم لازم تتأكدوا إن الدنيا دي ما تساويش حاجه تعصبك او تخنقك كل واحد فينا هيموت وده حاجه مؤكده لكن مش كلنا هنعيش الحياه صح عيشها صح كل الناس هتموت بس مش كل الناس هتعيش….

تحياتي ليكوا كلكوا …