من اجمل و اسهل انواع الكوكيز او البسكويت اللي ممكن تقدميها لاولادك و زوجك … يا جمالها مع كوب قهوة او شاء رائعة انصحكم تجربوها
مقدمة من / نيفين منصور
وقت التحضير / 15 دقيقة
وقت الخبز / 12 دقيقة
المقادير :
نصف كيلو دقيق ( الافضل دقيق بسكويت )
ربع كيلو زبدة باردة
نصف كوب زيت
كوب سكر بودرة
كوب نشا
ملعقة كبيرة كاكاو ( استخدمت ملعقتين لان النوع اللي عندي مش غامق )
ملعقة صغيرة فانيليا
رشة ملح
ملعقة كبيرة بيكنج بودر
من عندي ملعقة نسكافيه كبيرة
الطريقة :
– نخلط السكر و الزبدة مع بعض ( استخدمت زبدة لانها افضل في الكوكيز و البسكويت و استخدمتها باردة من التلاجة لانها بتخلي البسكويت مورق )
– نخلط الدقيق و النشا و البيكنج بودر مع بعض
– ننزل بخليط الدقيق بالتدريج و بالتبادل مع الزيت
ليه بالتدريج و بالتبادل مع الزيت و دي تكتي انا لان الزيت هيساعد ذرات الدقيق تتبلور جوة العجينة و تديني التاثير اللي شايفينه في الجزء المقطوع في الصورة
– هتتكون عندنا عجينة ناعمة ملساة
– نقسمها نصفين جزء نحتفظ بيه في كيس ابيض زي ما هو
– النصف التاني من العجين نخلط النسكافيه و الكاكاومع ملعقة واحدة ماء و نخلطه مع العجين
– ندخل العجين التلاجة نصف ساعة فقط و دي برضو تكتي
– نيجي للتشكيل هنعمل كريات صغيرة من العجين في حجم البندقةاو اكبر شوية
– ناخد 3 كريات ابيض و 3 كريات شوكليت بالتبادل في ايدينا بحيث يشكلوا دائرة
– نبتدي نلف بايدينا في اتجاه عقارب الساعة هنلاقي الشكل الحلزوني اتكون معانا
– نسخن الفرن على 180 درجة و ندخل البسكويت 12 دقيقة بالتمام و الكمال
– احنا عاوزينه اشقر من تحت فقط
– سيبيه يبرد في مكانه و انقليه لعلب الحفظ و كلي اجمل بسكويت مع مج نسكافيه يظبط النفوخ فورا
و الف هنا على قلوبكم يارب
مدير مطبخ سحر الحياة / نيفين منصور
