كتابة .. رانيا الجعبري
يمكن من العنوان تحتار هو ايه اللي مليش غيره. . انا قصدي جوزك
اه جوزك فعلا ملكيش غيره..
وطبعا انا هبتدي كلامي بتوضيح أن انا انا بتكلم علي الراجل الطبيعي اللي هو ولا سكري ولا بتاع ستات لدرجة الادمان ولا مضيع فلوسه علي المخدرات ولا ليل نهار يضربك وواخد فلوسك ولا النماذج الشاذه اللي بنشوفها في صفحات وبرامج الحوادث . ..
انا بتكلم علي الراجل الممل علي خفيف اللي ساعات يقولك معيش فلوس والله…
اللي بيكلم واحده يفضفضلها علي النت كل كام شهر وأول متقفشيه يعلمها بلوك ..
اللي آخر علاقته بالنت والستات يشوف كام صوره ويبص بجنب عينه عليها حتي وانت معاه …
اللي يقولك باباكي قابلني وحش النهارده وأكل مامتك غريب…
اللي بيزعق للعيال طول ماهو قاعد في البيت
اللي غالبا ميعرفش ولاده في سنه كام ..
اللي مبتشوفيهوش خالص ولو قولتيله انت فين يقولك انا مش بشتغل عشانكم…
اللي لما تقوليله خرجنا احنا زهقانين يقضي الأجازة نوم ..
اللي بيخرج يشتري طلبات البيت معاكي أو لبس العيد ووشه كئيب اوي … بس بيشترى
اللي مبيحبش يروح عند أهلك خالص… وعايزك مقيمه ليل نهار عند أهله
اللي مبينطقش لو عملتي أكل حلو ولو عملتي أكل وحش يعمل فضيحه
.اللي وانت تعبانه. . آخره يعملك حاجه سخنه ويقولك انت علاطول عيانه..
وهو أول ميتخبط وينزل نقطة دم يقولك انا بنزف.
اللي مفيش مانع لو احرجك شويه قدام أهلك وشويتين قدام اهله…
اللي أي حاجه حلوه في العيال بيقولك انه السبب فيها وأي حاجه وحشه يحاسبك علي تقصيرك…
اللي رايح جاي يطلعلك عيوب في البيت ويقول يافاشله يامهمله…
ولو طلبتي منه حاجه تتصلح أو تتركب بيعملها بس بعد سنه من أول مره طلبتي… ولو انت من المفضلين بالنسبه ليه هيصلحها في خلال 6 شهور
اللي لو قاعد وشايفاه طول النهار بيلعب علي التليفون وانت اول متمسكيه تكلمي حد أو تعملي شغل تسمعي جمله هو انت هتنفعي ولا هتعرفي تفتحي بيت وتربي عيال .. طول مانت ماسكه اللي يولع ده في ايدك …
ويبقي هيطق وانت بتكلمي مامتك أو اختك وينادي عليكي 60 مره في الثانيه…
تخيلي بقي لو جوزك كل ده هو برضه احسن راجل في الدنيا وملكيش غيره…
ليه بقي عشان تخيلي معايا بكل اللي هو بيعمله لو للحظة مش موجود هتحسي بالوحدة ازاي…
لو اتخانقتي وروحتي بيت أهلك هتحسي بس بالغربه وان ده مش مكانك…..
مش هتلاقي أي حد في الدنيا يحب ولادك قده .. ماهو أبوهم. حتي لو طول النهار يزعقلهم
محدش هيفكر نفسهم في ايه ازاي يسدد مصاريف مدرستهم .. قد ايه نفسه يجبلهم حته من السما بس لو يقدر ..
حتي التمني مش هيبقى موجود .. محدش بيحب ولاد حد زي مبيحب ولاده .
طالما جوزك صاينك مش بمعني انه طول النهار يشكر ويحب فيكي لا بمعني انه معيشك انت ولادك حياه حلوه مش محرومين من حاجه علي قد دخله وامكانياته. ….
بكره ابوكي وامك مش هيبقوا موجودين واخواتك كل واحد مع بيته وولاده…. وولادك هيتجوزا ويتشغلوا بحياتهم. .
وانت ملكيش غيره …
وأخيرا ..
حبي جوزك علي طبعه واتعاملي زي ماهو عاوز في نطاق المسموح..
ريحيه واديله كتير اوي واوعي تستني تاخدي زي مابتدي. .
جوزك هو ابنك الكبير ..
والله ملكيش غيره
.. متخربوش بيتكم علي أسباب تافهه. .
