كتابة .. رانيا الجعبري
قبل كده كتبت وقلت جوزك وملكيش غيره وتستحمليه علي شوية العيوب البسيطه ..
لكن قبل الجواز بقي بشوف كمية تنازلات غريبه…
في كل حاجه …
ممكن اعرف ليه خد فلوس هات هديه لماما وانت جاي .. مانشاء الله عنه ماجاب..
انت قوليله لو متأكده انه مرتاح ماديا ومش هتضيعي فلوسه اللي بيحوشها عشان يتجوزك. هات معاك ياحبيبي هديه لماما عشان عيد ميلادها …جاب يبقي انت فهمتيه يعمل ايه. ( انت بس بتوجهي لو محتاج توجيه) مجبش يبقي بخيل وتسيبيه وتخلصي. ..
دي حاجه بسيطه في الأكبر بقي
زي انا هجيب العفش
انا هشارك في السيراميك ونبني بيتنا مع بعض والجو ده ..
والله هو يقول يقدر يعمل ايه من الأول واهلك وأهله لو موافقين وانت ساعدتيه أو أهلك ساعدوه. . وكلنا عارفين كده ماشي تمام …
بس بلاش يبقي عامل 7 رجاله في بعض وأهله فاكرين انه العريس اللقطه اللي هو كتير عليكي اصلا .. وانت زي الهبله عماله تعملي كل حاجه ..
ممكن كمان .. بلاش تروحي تزوري أهله لوحدك .. حتي لو ده كان عادي ومتاح في الوسط بتاعك…
روحي مع أي حد انشاء الله اخوكي الصغير…
ده كله بيفرق لما تتجوزي ويفضل فاكر انك مرضتيش تروحي عندهم لوحدك …
وحتي أهله بيحترموكي اكتر ….
بعد الخطوبة لو قالك انا عندي مشكله ماديه وعايز الشبكه بس متقوليش لحد ..
طبعا انت هتجري تديهاله وتقولي بيختبر أصلي وتعيشي في دور البت اللي ملهاش حل …
بصي انت كده كده هتديهاله لأن ده تمهيد انه هيسيبك وخايف ساعتها متديلوش الشبكه. . فاديهاله وقوليله مع السلامه…
بصي وانت مخطوبه لو عرفتي انه رجع لخطيبته القديمه أو بيدخل يطمن عليها علي الفيسبوك أو أي واحده بيكلمها ..متقوليش لازم أقف جنبه ودي بتضحك عليه لأ انت سيبيه فورا. ..
بلاش تسمعي الكلام زياده عن اللزوم يعني خليكي في الطبيعي لكن بلاش جو متروحيش مع مامتك عند خالتك أو مع اخوكي تشتري حاجات وهتمشي مع اخوكي في الشارع( ياقلب أمه بيغير عليكي و ميقدرش يستحمل المنظر ) والأحلي بقي متسلميش علي ابن اختك لأنه بقي كبير..
ده تقوليله ابن اختي ده انا كنت بغيره البامبرز من كام سنه كده وتفكك منه حالا لأنه ده معقد وهيقرفك أو بيحب بيمثل دور الخطيب الممل…
في بقي تنازلات من نوع تاني ..
يشتمك ويهزقك وأحيانا يضربك وانتوا مخطوبين وانت موافقه ليه معرفش…
غالبا البنت بتبقي متخيله أنها مش هتقابل حد تاني ومش هتحب حد تاني …
لا خالص اسرحي بس بخيالك شويه ده لما تتجوزيه هيعمل ايه… فمتقوليش لما نتجوز هيتغير ولا ده عشان بيحبني.
لأ ياقلبي انا .. ده طبعه وهيفضل يضربك طول عمره ..
وفي بقي تنازل البنات بتعتبره إثبات لحبها. .
زي ايه بقي ..!! تخرج معاه عمال علي بطال من ورا أهلها. .
(ليه ياحبيبتي ماهو خطيبك وهتتجوزا..
وهتتمني لحظة نزوله من البيت) فياريت زي ماهلك عاوزين اعملي ..
لأن أول حاجه هيبقى فاكر ها وانتوا متجوزين انك كنت بتخرجي معاه من ورا أهلك .. وبتعملي كل حاجه غلط …
فياريت بلاش جو تعدية الشارع وركوب التاكسي جانبك وجو التلزيق والحب اوي اللي في الشارع ده …
الناس ملهاش ذنب يشوفوا القرف ده ..
واكتر من كده بيحصل من منطلق خطيبتي وهتبقي مراتي..
وحتي لو مش في الشارع وانتوا لوحدكوا. .
ليه بتتنازلي عن كرامتك واحترامك لنفسك ليه بتدي اكتر من المفروض .. هو انت ضمنت انه هيتجوزك!!! (ماقبل الجواز بيوم بيسيبوا بعض …)
اتعاملي علي أنه خطيبك بس ..
حبيه في انك تساعديه يشتغل ويتعب عشان يحقق طموحه ويبني مستقبل كويس ليكو … استحملي ميكلمكيش طول النهار عشان مشغول.
وافقي إنه يتجوزك علي قد إمكانياته. . ومتقارنيهوش بحد ..
توفقي بينه وبين أهلك .. تحبي أهله وتحترميهم. ..
وفي الآخر لازم تبقي عارفه ومتأكده أن نصيبك جاي جاي .. فبلاش والنبي تنازلات وتضحيات عشان الجوازه تمشي…
مكتوبلك هتمشي مش مكتوبلك هو اللي هيمشي …
## حافظي علي كرامتك واحترامك لنفسك….
## اللي بيجي بسهوله بيروح بسهوله…
## في الأخر هتلاقي حالك زي الصوره ?? ( انا تعمل فيا كده )
