بقلم دكتورة زينب زكى
” وَأَمَّا بِنِعْمَةِ رَبِّكَ فَحَدِّثْ ” لما ربنا يعطينا من فضله وكرمه اوعوا ننسى احنا كنا ازاى ونبخل على غيرنا بخير .. ربنا هو اللى مديهولنا من فضله وكرمه
كان يا ما كان يا سعد يا اكرام ما يحلى الكلام الا بذكر النبى عليه الصلاة والسلام
كان فيه زمان زمان 3 من الشبان أحمد وخالد وعثمان .. كل واحد منهم عنده من المشاكل كتير الوان .. فقر ومرض ربنا يعفو عن الجميع يارب
ايه اللى حصل ؟؟؟؟؟؟؟ تعالو نشوف …..
فى يوم من الايام اجتمع التلاتة مع بعض وكل واحد منهم بيتكلم عن اوجاعه وهمومه .. أحمد قال انا فقير وكمان مريض بالبرص والناس كارهينى وبيقولوا شكلى حقير
وخالد قال وانا كمان فقير وكمان اصلع واسمر وماليش اى منظر وكل ما حد يشوفنى يتريق ويهزر
اما عثمان الغلبان فكان كفيف البصر وكمان فقير لكن كان راضى بقسمته ونصيبه وتملى يدعى ربنا يردله بصره
وفى يوم من الايام جالهم راجل جميل شكله ملاك من عند ربنا سألهم ليه مهمومين عرفونى مشاكلكم اساعدكم فيها وبفضل الله الحلول عنده سبحانه كتير
وكل واحد منهم قال على مشكلته
قالهم الحلول موجودة عند ربنا مش هيصعب عليه الحل وان شاء الله هيرزقكم برزق وفير بس ندعى ربنا ونصلى كتير ونطلب منه يعطينا ما نتمنى
أحمد طلب من ربنا يشفيه من البرص ويكون تاجر جمال كبير وربنا استجاب لدعاه ومن خيره الوفير اعطاه
وخالد طلب يكون عنده شعر جميل ويكون تاجر مواشى كبير وربنا استجاب لدعاه ومن خيره الوفير اعطاه
اما عثمان قال يارب ارفع عنى الكرب ورجعلى بصرى وعاوز مجموعة من الغنم يساعدونى اعيش
وعدت ايام وشهور وسنين
وفى يوم من الايام سأل عابر سبيل احمد وقاله انا فقير وعابر سبيل وطلب منه ناقة تساعده فى الطريق .. رفض يديله وقاله معنديش انا كمان فقير ..عابر السبيل زعل واتكسف وقال اللهم له مثل ما قال فخسر احمد كل امواله ورجع تانى فقير ومريض زى ما كان
وراح عند خالد وقاله اعطينى بقرة تساعدنى على عيشى انا عابر سبيل وكمان فقير قاله معنديش انا كمان فقير .. عابر السبيل زعل واتكسف وقال اللهم له مثل ما قال فخسر خالد كل امواله ورجع تانى فقير ومريض زى ما كان
راح عند عثمان وقاله اعطينى من اغنامك ما يعينى على العيش والحياة الكريمة فأنا عابر سبيل وكمان فقير رد عليه عثمان وقاله والله انا كنت اعمى وفقير وربنا اعطانى مال كتير وخير وفير خذ ما شئت من الغنم والمال فهو رزق الله ولك فيه ما شئت فقال عابر السبيل اللهم زده من فضلك وكرمك
فزاد الله عثمان مال على ماله وكرم على كرمه لكرمه على عابر السبيل
شوفتوا ازاى ان الصدقة لا تنقص من مال انها عطيه الله لك فان منعتها عن عابر السبيل منعها الله عنك وان انفقت منها زادك الله من ماله كرمه وفضله
وتوتة توتة خلصت الحدوتة حلوة ولا
تحياتى للجميع
ماما زوزو
