ثروت بديع
بحبك يابلدي
نسيمك و نَفَسَك
ترابك وعفرك
زبالة شوارعك
تقطع فى نَفَسي
و اسعل و أسعل
و العن أم اللى اتعزم وجابك
واتعب وأأيل
تجيلى فى منامي
أوام تقلقينى
تجينى تنادينى
تمدي ايديكى ف صدري تداويني
تجيني عروسة
وحضن وبوسة واعاكسك واناغشك
واكسر عضامك
واحس بمرار الشهد ف رضابك
دى دمعة عيونك بتغسل أنينى
واسجد لك تسامحى ياعارفة إني عيل
ف صدرك أأيل بالحضن تعافيني
و اقولك بحبك بحبك يابلدى
بحبك يابلدي
ف نجعك وكَفرِك
ف زُهدِك و كُُفرَك
بحبك ف دمعة عيونك وشرخة ف صوتك
واكون عكازك عصايتك ومسند جبينك
بحبك ف وجعك لما تناديني
بحبك ف وجعي يوم تسندينى
والعن ف أم الى عزم وجابك
ف يوم ترفضيني
وقلبي يعنادني ويقولك بحبك بحبك يابلدي
بحبك ف خضره بحبك ف صحرا
بحبك فى شطك وترعة و مرسا ومدينة
بحبك واهاجرك وتبقى انتى حبي وشوقي و حنيني
واعود للسفينة وااقولك بحبك بحبك يابلدي
بحبك معفر بحبك مريح بحبك مأشفر لحد الحديدة
بحبك يابلدي مرقة وعصيدة
بحبك يابلدي ف كُفْر القصيدة
بحبك يابلدي. يا كل القصيدة
بحبك يابلدي ف آخر القصيدة
مدير قسم الأدب والشعر
علا السنجري
