كتبت:سميه مجدي
جمله وقاعده ذهبيه عند بعض النساء، وفي أمهات من الخطوبه تبتدي تززززن في ودن بنتها بهذه القواعد العجيبه ،وطبعا في ناس هتقول ده كان زمان…… لا لسه موجوده لدلوقتي مش بس كده وبين ناس متعلمه وخرجين جامعات كمان ،لأن زي ما اتفقنا ان التعليم ليس الثقافه في متعلمين تعليمهم محصلته القراءه والكتابه ونقطه ومن اول السطر.
اولا محدش بيربط حد، اللي عايز يعمل شئ بيعمله تفكير أن كثرة الخلفه هتهد وتكسر ظهر الرجل في المصاريف فمش هيبص بره ولا هيسيبك،تفكير خطأ جدا وانتي أول واحده هتتأذي بسببه ومش انتي وبس، انتى والأطفال اللي ملهاش ذنب تجبيها علشان تمسكي بيها راجل مش قادر يصرف عليهم وبرضه بيبص بره ،وممكن يوصل انه يزهق ويرميكي بولادك اللي مصره تمسكيه بيهم ويروح يتجوز واحده ثانيه وانتي دوري بقي هتعيشي منين لانك في الاصل لغيتي عقلك وتفكيرك كانسانه واعيه وبقيتي مجرد ماكينة ولاده.
طبعا غير الآثار السلبية علي صحتك وعلي صحة الاطفال اللي بتتولد ضعيفه بسبب ضعفك أنتي،وغير انك اصلا مش هتبقي فاضيه للانسان اللي بتحاولي تكسري ظهره بكثرة الاولاد علشان ميهربش فهروبه شئ مؤكد ومش هروبه معناه لست ثانيه لا للقهوه، لمخدرات، لسوء معاملتك، لضربك وإهانتك في طرق كثيره جدا
لو الانسان خاين فهو خاين، الاولاد مش هتوقفه عن الخيانه ،إذا انتي مش حسنه العشره، الاولاد مش هتغيرك وتخلي عشرتك حسنه وطيبه ان زوجك ميبعدش عنك ،اذا الانسان مش عايز يفضل معاكي، الاولاد ان خلته فهيفضل جسدا وبس، واعرفي انك بالنسبه له مجرد خادمه للاولاد والبيت وطلباته ،ولكنه هو كزوج مش موجود هو مشي من زمان.
الزواج مش معركه مين هينتصر علي مين فيها، ومش هتكسري ظهره ازاي علشان يفضل معاكي، ومش هتقصي ريشه بالاولاد اللي ملهمش ذنب في معاركم دي، وقبل كل ده في كرامتك كانسانه ان لم تكوني تكفي بشخصك ونفسك اربطيه بالاولاد لن تغير من ذلك شئ وبينك وبين نفسك انتي بتموتي نفسيا لأنك مش لقيا ثواني تفكري من كثرة الاولاد.
أكسروا تقاليد عقيمه وفاشله ومهينه للكرامه وعيشوها بموده ورحمه وحسن عشره ومعروف او افترقوا باحسان واحترام.
