الارز باللبن و الموز بصوص الطوفي

الارز باللبن و الموز بصوص الطوفي من مطبخ نيفين منصور

مقدمة من / نيفين منصور

وقت التحضير / لايوجد

وقت الطهي / 30 دقيقة

المقادير :

كيلو حليب

كوب ارز مش مغسول و لا منقوع

كوب سكر او حسب الرغبة

نصف كيلو موز بلدي مستوي ياريت

رشة فانيلا

رشة ملح

باكيت كريم شانتييه بودر

الطريقة :

* هنحط الارز مع كوب و نص مية على النار اول ما يغلي نهدي النار عليه و نسيبه لحد ما الرز يستوي تماما بس نقلبه من وقت للتاني

* اول ما الارز يستوي ننزل عليه بكمية اللبن الا كوب و معاهم السكر و نخلط كويس

* في الخلاط هنحط الموز و معاه كوب اللبن اللي سيبناه على جنب من الكيلو

* الخطوة دي اختياري لو انت بتحبي الارز باللبن يبقى جامد اوي هتحطي مع الموز و اللبن ملعقتين كبار نشا و تضربيهم كويس في الخلاط

* انزلي بخليط الموز و اللبن على الارز باللبن اللي على النار و قلبي لحد ما تلاقي الخليط اسمك و ابتدي يبقلل رشي الفانيلا و شيليه من على النار و نزلي عليه باكيت الكريم شانتييه مع التقليب المستمر و صبيه في الاطباق و دخليه التلاجة اما يبرد

و الف هنا على قلوبكم يارب

مدير مطبخ سحر الحياة / نيفين منصور