كتبت: شاهيناز عبد اللطيف
من اجمل قصص الحب اللي شاهدتها لايف
كانوا جيران عندهم من الأولاد سبعة
موظف زيه زي ملايين , مطحون علشان يوفر لقمه العيش.
هي: ربة منزل مصرية فلاحة من اللي بميت راجل اللي عندها الف حل وحل للمشكلة الواحدة .
كان اول مايدخل البيت يدور عليها هي مش علي اي حد من ولاده، طب عاوز حاجه يابابا ، لا باطمن عليها
لما تكون مش موجودة بيبقي عامل زي الطفل الصغير اللي تاه منه طرف جلابية امه ، تنه رايح جاي لحد ماتدخل من باب البيت.
هي تكون قاعدة معانا فأوضه البنات بنحكي ونضحك او بتعلمنا طبخه مثلا ، بس اول ماتسمع صوته مانشوفهاش خلاص ، لا نعرفها ولا تعرفنا
هي معاه وجنبه ادام عينيه رهن اشارته
كنت اختلس النظرة لغرفتهم وانا طالعه وانا داخله ، هي قاعدة بتشتغل تريكو او علي مكنتها وهو بيقرأ جريدة او بيسمع الراديو، ساكتين بس المهم انهم ادام بعض متونسين بوجود بعض في حوار داير بس من غير كلام.:) #ألفة
مابيتخانقوش طيب !! لا اكيد بيتخانقوا دول مش ملايكه، بس الود اللي بينهم اقوي من اي خلاف.لاعمرها ذكرته بكلمه وحشه ولا هو خلاها تنام زعلانه ابدا #مودة_ورحمة
لحد مالزمن قال كلمته وشقي السنين فرض وجوده
مرض الراجل وقال الدكاتره ده ورم لازم استئصاله.
هي: رجعت من المستشفي عالبيت من غير ماتنطق بكلمة يومين تلاته ساكته بيصحوها لاقوها ماتت.
هو: فين ماما ياولاد ؟؟ تعبانه شوية لا دي وقعت لا دي دايخه ، حجة ورا حجه وهو عامل نفسه مصدق ، قلبه لأ مش مصدق .?
خرج من المستشفي بعد شفاؤه دخل البيت يدور عليها فأركانه كالعادة..ملقهاش ، عرف ، دخل نام ،بيصحوه ،لاقوه مات .
بين موتها وموته ايام ، هي ادفنت اول يوم رمضان وهو كان بيدفن اول ايام عيد الفطر ، هي أعمار مكتوبه بس في اسباب .
هو ده المعني الحقيقي لعشق الروح ، 🙂 ، روحها ماستحملتش الدنيا وهو غايب بجسده ، وروحه جريت ورا روحها تدور عليها فدار الحق ، المرض ماموتهوش اللي موته غيابها .
الموضوع عدي معاهم مرحلة الوفاء للذكري .
هو في كده !! اه في واكيد اللي حكيته ده نقطة في بحر حكايتهم اللي كلها تضحية مع شقي مع صبر معجونين بالحب والتقدير والاحترام .
هي دي النهاية المبهرة بالنسبالي مهما كانت روعة البداية
#Shahy
