سماره

عشقت عيونك ياسماره

ورمشك زى السناره

بصيد الدقه من قلبى

يجمعها..

يلونها..

ويبنى فقلبى انا عماره

شفايفك خمره ربانى

بتسكرنى..

وعجبانى

تدوبنى واقول تانى

وبكتب فى سمار لونك

وفى جفونك..

قصايد شعر وأغانى

وعن الباقى لو اتكلم

بقف قدامها وأبلم

ما لاقى وصف ومعانى

وألحانى..

بتطلع منى تترقص

وكل اللحن مابيخلص

برجع اعيده من تانى

والاقى نفسى ف ثوانى

مطوح فى موالك

وعلشانك..

بسيب الدنيا واجيلك

عاشق لون مواويلك

وباديلك..

قلبى يا سمرا وانا راضى

مهو انتى الخصم والقاضى

شكيتك بس لعيونك

وهارضى بكل احكامك

صباحك شمس بتنور

بتطلع بس تندهلك

وطول الليل بتشتاقلك

لحد الفجر ما يشقشق

بتجرى اوام وترجعلك

وليلك بدر ومدور

جماله فوق مابتصور

بيغزل ضيه توب فضه

على كفوفك ويتوضى

وبينادى على نجومه

ويعمل اسوره ف ايدك

وعقد نجومه بتلالى

وتاخدنورها من جيدك

ربى يحرسك م العين

ياحلوه تمللى ويزيدك

———————

ابومهاود

محمد احمد حسن