السعاده
الجزء التانى
بقلم: نسرين محمد
ونكمل مشوارنا الجميل مع السعاده؛؛ ديما منتظرينها ديما مستنيين الي قدامنا يقدمهلنا؛؛ طيب متيجو نجرب احنا الي نقدمها لحبايبنا؛؛ ننشرها في كل مكان؛ خلينا سفراء للسعاده خلينا نبقا احنا الي مصاحبين للسعاده ونكون مصدر ليها؛ وصدقوني هترجع لينا اضعاف اضعاف المهم نركز ونحط نيه طيبه وننشرها زى عبير الزهر في كل مكان؛ خليك ربيع للي حوليك خليك مصدر للخير والمحبه للناس كلها– يعنى مثلا لو انتى بنوته خلي معاكي ديما حلويات في شنطتك وزعيها علي اي طفل تقابليه واضحكيله وطبطبي عليه؛؛ لو انت شاب امشي ساعد اى حد تقابله وابتسمله جايز تكون ابتسامتك دى الحاجه الوحيده الحلوة الي قابلها في يومه؛؛ لو انتى ام حبي ولادك زى ماهما كده حبي عيوبهم قبل مميزاتهم كونى سند وضهر ليهم واياكي تسمحي لحد يمسهم بكلمه او نقد خليكي انتى مصدر الامان ليهم في الدنيا دى ومتقوليش الوقت عدى او فات ابداءى وصلحي ولملمي ولادك في حضنك بوسيهم احضنيهم اعتذرلهم لو غلطتى صاحبيهم صدقيني الدنيا من غيرك صعبه اوى عليهم انعمى باحضانهم وضحكهم الي من القلب مش هتلاقي اصحاب ولا اخوات احسن من ولادك من الاخر بريهم بريهم في صغارهم يبروكى لما تكبرى؛؛؛ لو انت اب خلي دخلتك بيتك فرح وعيد بلاش بالله عليك دور الجلاد او القاضي خليك الصاحب والامان لابنك خليك الحبيب لزوجتك وبناتك خليك الصديق الغالي الي الكل مستني دخلته البيت وشوفته خلي دخلتك عيد علي ولادك مش خوف وهم ورعب منك (خيركم خيركم لأهله )صدقت يا حبيبي يا محمد صلى الله عليه وسلم
دمتم سعداء وسفراء ليها
رئيس قسم هو وهي : داليا طه
