سيد صادق
اللي باقي م البلاد ..
و هيبقى ورث للولاد ..
لب ( سوري ) و فول ( سوداني )
و ف ( اليمن ) مليون شنب ..
باعوا نصيبهم م العنب ..
كله مجني وكله جاني
ومين صح ومين فلح .. ؟!
مين خسر ومين نجح .. ؟!
دي ( الشام ) لو تزرع بلح ..
يطلع بارود في ثواني !!
كله مجني وكله جاني
متلغبطين و اللغبطه ..
بتشدنا لأبعد بعيد ..
التوهه كشفت سترها ..
غوله و ليها الف ايد ..
خدنا خلاص ع المرمطه ..
و التكبيرات مش جايبه عيد !!!
قلوب وحوش من غير عقول
و الحمل زود ف الحمول ..
عايزين نبي ولا رسول ..
يكفينا شرها …
و بلاش نعاني .
كله مجني وكله جاني
متسلسلين ف سلسله …
ماسكه فينا ايد و رجل
سيبنا حبل ربنا …
و رجعنا تاني عبدنا عجل
بدل ما نزرع ف الامل …
بكل همه زرعنا فجل
قلوب وحوش من غير عقول
و الحمل زود ف الحمول ..
عايزين نبي ولا رسول ..
يكفينا شرها …
و بلاش نعاني .
كله مجني وكله جاني
مدير قسم الادب والشعر
علا السنجري
