ثروت بديع
عمرك فكرت
لو يوم تبقى جرس إنذار
خدت قرار
بدل الرن تنزل مرة تطفى النار !
عمرك فكرت
لو انت حبة رمل جوه الصحرا
خدت قرار
جاتك فكرة
تبقى عيونك نبع المى
وقلبك حقل لمليون شجرة !
عمرك فكرت
لو كنت نصيحة فى كتاب نقد
خدت قرار
بدل النصح
إنك تهرب بره السطر
تبقى حقيقة تعيش ع الأرض
يوم فكرت ؟
ترفض يجرى العمر … وانت أداة
وان الكلمة عظيمة مهمة
لكن الفعل كله حياة !
مدير قسم الادب والشعر
علا السنجري
