حوار بنازير مجدي
زوجتي أهم إنسانة وقفت ورايا دايما……
اتعلمت من تجربتي مع الفنان والنجم الكبير ” نور الشريف “، الانضباط واحترامه الشديد للمهنة……
قابلت صعوبات كتير في دخولي إلي الوسط الفني……
الكورة هوايتي المفضلة……..
بداء حياته علي المسرح، ليشارك في ما يقرب من أربعة عشر مسرحية علي مسرح الدولة، يراه المخرجين في أدوار الخير، لملامحة الطيبة والتي تشير إلي شخصيته الحقيقة في كثير من الأحيان، شارك في عدد من الأعمال الدرامية مع عدد من النجوم والفنانين الكبار، من بينهم النجم والفنان الكبير ” نور الشريف “، هو النجم أحمد هاني، صاحب الكاريزما الخاصة والمليئة بالمواهب……
أحمد هاني حدثنا عن نفسك وكيف كانت بدايتك ودخولك إلي مجال التمثيل ؟
بدايتي كانت في المدرسه الاعدادي، كنت عايز اشترك في اي نشاط فني بس مكنتش عارف انا موهوب في ايه بس كنت حابب.
لقيت كورال المدرسة، فاشتركت فيه وفي يوم كنا مستنين مدرس الموسيقي المسئول عن الكورال اتاخر شويه علينا قعدت اقلده والولاد قعدوا يضحكوا، وهو كان بيتفرج عليا من بره القاعه وفجاءه دخل خفت جدا افتكرته هيضربني بس عمل العكس قالي يابني انت مبوظ الكورال بقالك كذا بروفه انت ملكش علاقه بالموسيقي انت دمك خفيف ممكن يكون عندك موهبه التمثيل ووجهني اني اشترك في فريق الالقاء.
وفعلا اشتركت لغايه مابقيت مذيع المدرسه اقول موجز اخبار وابيات شعريه، و أي توجيهات من الإدارة كل ده في طابور الصباح.
وكانت البدايه ….. لما دخلت الثانوي بداءت اشتغل في المسرح، وطبعا بعد ماخلصت قدمت في معهد التمثيل وكانت بدايه الاحتراف.
ماذا عن تجربتك المسرحية ؟
المسرح كان بدايتي في المسرح اشتغلت حوالي ١٤مسرحية، علي مسرح الدوله ، ومسرحيه واحده قطاع خاص.
بما انك خضت تجربة التمثيل علي خشبة المسرح، والتمثيل الدرامي أيهما أقرب إليك ؟
طبعا بحب المسرح اكتر، وتحديدا المسرح الكوميدي؛ لأن عملت مسرحيات كوميدي كتير، ونفسي اشتغل كوميدي في التليفزيون والسينما بس لسه الفرصه ماجاتش.
ماذا عن تجربتك مع المخرج نادر جلال ؟
تجربتي مع المخرج نادر جلال، من أجمل التجارب في حياتي هو شغلي مع الاستاذ نادر جلال، هو مخرج وانسان جميل بيعامل كل الممثلين معامله واحده.
ماذا عن ظهورك المتكرر في أدوار الخير هل دي له علاقة بشخصيتك الحقيقية أو من قبيل المصادفة ؟
أدوار الطيب صدفه المخرجين بيسكنوني فيها.
ماذا عن تجربتك الجديدة في مسلسل أفراح أبليس ؟
فرحان بدوري في افراح ابليس جدا، لأن اول مرة اعمل صعيدي وكمان شرير ومبسوط بالشغل مع احمد خالد امين جدا اتمني من ربنا ان المسلسل يعجب الناس.
ماذا عن رؤيتك كفنان للإعلام المتواجد حاليا ؟
الإعلام حاليا في بعض الاجتهادات.
هل يقوم الفن بتأدية الدور الحقيقي له ؟
لا للاسف الفن دوره اهم بكتير من اللي بيلعبه الفن دلوقتي.
ماذا عن أفضل فنان في مصر والوطن العربي بالنسبة لك ؟
أفضل فنان بالنسبه لي احمد زكي الله يرحمه.
ماذا عن رأيك في المنتجين المتواجدين الأن علي الساحة هل يعطون الفنان حقه ام ماذا ؟
في بعض المنتجين ظهروا مؤخرا بيدوروا علي الفن قبل المكسب زي محمد مميش وريمون مقار ومحمد محمود عبدالعزيز يارب يكتر منهم.
هل تؤمن بمقولة ” وراء كل عظبم امرأة ” ؟
طبعا وراء كل عظيم امرأه، زوجتي هي اهم إنسانة وقفت ورايا.
ماذا عن موقع كلمة الندم في حياتك ؟
بكره كلمه الندم دايما بفكر في اللي جاي.
هل واجهت صعوبات في دخولك إلي مجال الفن جعلتك تفكر في الإبتعاد عنه ؟
قابلت صعوبات كتير في دخولي الوسط، خصوصا ان انا واللي زيي اللي مالناش وسطه الموضوع بيبقي صعب جدا.
هل تسمح لأبناءك بالدخول إلي مجال التمثيل ؟
لا اسمح لاولادي دخول المجال بسبب الصعوبات والتعب اللي شوفته.
الرسالة التي توجهها إلي شخص ظلمك ؟
حسبي الله ونعم الوكيل في اي حد ظلمني.
سؤال بعنوان أكمل…..
السياسة لعبة غير شريفة
دعوة لمصر ربنا يحفظها ويحفظ أهلها
الكورة حبي التاني بعد التمثيل
الأهلي أهلاوي فظيع
هوايتي المفضلة الفرجة علي الكورة
القراءة اعشقها
الأمان وجود زوجتي بجانبي
تجربتي مع نور الشريف اشتغلت معاه الدالي وعمرو بن العاص اتعلمت منه الانضباط واحترامه للمهنه
يدعمني كثيرا زوجتي 
