كلمات الشاعر/ابانوب تاوضروس
زي النهارده وفي نفس الساعه
من يجي كام سنه
اتسرق من عيني النوم
ونسيت طعم الهنا
بقي قلبي جافي
بعد ما كانت كل حاجه حنينه
زي النهارده
سابتني من غير وداع
بكي قلبي بحرقه
علي حلمي اللي ضاع
وعرفت طعم الفرقه
ويعني ايه معني الصداع
بطلت انام
مبقتش اشوف احلام
صحيت من كل الافلام
اللي ياما في خيالي عيشتها
فقدت كل حاجه في يوم عشقتها
سابتني وانا لسا بحبها
لكن الظاهر هي محبتنيش
والا كانت مفارقتنيش
وبعد ما كانت حياتي مرتبه
صبحت شيش بيش
بقت تلويش
بعد ما كانت روحي مليانه
دلوقتي مفيش
مبقتش أامن لحد تاني
حتي لو مش زييها
بقيت اشوفها في غيرها
وعامل قال ايه مش محتاجلها
عايش علي حبها
لسا متعلق بحبال كدبها
رغم انها دابت
تبت فيها بكل قلبي
فجاءة ايدها سابت
وعدتني انها تبقي
وفي لحظه غابت
كانت روحي شاب عفي
دلوقتي روحي شابت
زي النهارده ضهري انكسر
بعد ما كان مفرود
واحساسي بقي زي
اوتار من غير عود
زي جثه عفنت
وقرب ياكلها الدود
حيلي بقي مهدود
بعد ما كنت مصلوب الحيل
بقيت واحد تاني غيري
اتعود في صغره للهم يشيل
زي النهارده
اتمنيت ولو كنت مش موجود
اتمنيت اموت
صرخت بعلو الصوت
دفنت حياتي في تابوت
جايز دلوقتي تكوني عايشه
وجايز تكوني نسيتي
اللي خلاكي زمان تسيبي
اكيد دلوقتي خلاص اسيتي
