الحمد لله حققت احلام من احلامي وعندي امل باقي احلامي تتحقق
الحب في حياتي كل حاجه انا عاطفيه جدا
بعد موت ماما كنت كارهه كل حاجه
أول من دعمني ماما الله يرحمها وقفت معايا من البدايه للنهايه
زمان كنت بحب البس العرايس أوي وكنت بعمل حاجات كروشيه ليهم
ليا طقوس غريبه مع التوتر والقلق
حوار:مها نور
عندما تكون نقياً من الداخل يمنحك الله جمال فوق جمال الوجه يضع الحب في قلوب من حولك يحبك الجميع من دون شرط ، كلمات اقل بكثير مما تستحق ان يقال عن ضيفتنا فعندما تقترب منها تجد امامك أُم وزوجة مخلصة ، إنسانه بكل معني الكلمه نقية متصالحة مع روحها ومن حولها ،اُنثي بدرجة أميرة يملؤها الحُب والحنان والعطاء ملامحها ملامح تنم عن الطيبة والنقاء والرقة والصدق ،تَنثرعبيرصدقها وجمال روحها علي كل من يقترب منها تُحب عائلتها بجنون، فهم في المرتبة الأولي تعشق عملها في الأزياء وتحترمه راضيه ومتصالحه مع نفسها في زمن قل فيه الرضي والعطاء إنها مصممة الأزياء الجميلة “نغم منير” اقتربت “مجلة سحر الحياة ” منها لتُجري معها حوار خاص من القلب وسألناها…
،،إسمك مميزمن الذي اختار لكِ اسم نغم إحكي لنا عن سبب إختيار الإسم؟
،بابا الله يرحمه هو اللي اختار لي إسم نغم لأنه كان فنان وأنا بحب إسمي جداً وبعتز بيه
،،هل تصميم الأزياء كان حلم من أحلامك وهدف يجب تحقيقه منذ الطفولة؟
،أنا خريجة كلية الحقوق جامعة عين شمس زمان كنت بحب البس العرايس أوي وكنت بعمل حاجات كروشيه ليهم وكنت باخد مفارش السفره الصغيره اخيطها واعمل منها فساتين للعرايس وبعد كده بقيت بعمل حاجات ليا كانت بتعجب اصحابي
،،كيف تحقق الحلم ؟ومن أكثر شخص وقف بجانبك في بدايتك لتحقيقه؟
،بدأت الأول بالإكسسوار كنت بنبهر جداً بالوان الأحجار واشكالها وكنت بعمل حاجات الحمد لله مميزه وبعدها تطور الموضوع للأزياء برغم اني عارفه انه صعب لكن كنت عايزه جداً اني اعمل حاجه بحبها
أول من دعمني ماما الله يرحمها وقفت معايا من البدايه للنهايه كل خطوه في حياتي وكل نعمه انا فيها بفضل الله ثم أمي حتي بعد موتها لسه هي سبب كل الحلو اللي في حياتي بعد ربنا
،،هل مررتي باحباطات وصعوبات من منافسين لكِ جعلتك تفكري في عدم إكمال مسيرتك ؟
،اكيد مريت بمشاكل وصعوبات مع ناس في مجالي خلتني اقول مش هاكمل واتخنقت لفتره من كتر الضغوط بس رجعت لاني بحب المجال ده جداً
،،إحكي لنا عن موقف صعب مررتي به في حياتك كاد ان يوقف احلامك لكن هزمتيه؟
،موت ماما كنت كارهه كل حاجه من بعدها والدنيا ماكنش ليها اي لزمه في عيني بس كنت خايفه من رفضي موت ماما يخلي ربنا يزعل مني وكنت بقول لربنا انه غصب عني بس مش قادره اعيش من غيرها ،وفجأه ربنا بعتلي هديه حلوه واكتشفت اني كنت حامل وقت وفاة ماما بس عرفت بعد وفاتها بشهرين ورجعت تاني للحياه بهديتي الحلوه وافتكرت كل كلام ماما اللي بيأكد اني لازم ابقي أقوي واثبت نفسي واني ابقي ام تلم ولادها في حضنها وتقوي بيهم وليهم
،،هل حققتي كل احلامك؟ وما هي الأمنية التي لم تحققيها حتي الأن؟
،الحمد لله حققت احلام من احلامي وعندي أمل باقي احلامي تتحقق الحمد لله أنا حققت حاجات كتير حلوه في حياتي اتجوزت اللي حبيته اشتغلت الشغل اللي بحبه واخدت الشهاده اللي كنت عايزاها الحمد لله علي كل حال،احلامي اللي جايه أغلبها لاولادي ربنا يحميهم وان شاء الله تتحقق
،،ياتري لكِ طقوس معينة قبل دخولك لعمل اي تصميمات جديدة؟
،اه ليا طقوس غريبه مع التوتر والقلق بفرد الأقمشه قدامي أيام كتير ورا بعض وبمسك ورقه وقلم ولا بكتب ولا برسم وبلم الاقمشه تاني وافضل كل يوم كده لغاية ما ايدي تمسك القماشه تجهزها للتصميم
،حدثينا عن احدث كولكشن لكِ وسبب إختيارك لنوعية وطباعة الأقمشة؟
،،الكولكشن الجديد حبيته يبقي مميز شويه وفي نفس الوقت بسيط دايماً بحب السهل الممتنع في التصميم وبحب القطعه تبقي مميزه وغريبه وبسيطه وسهله في اللبس وفيها فكره
،،هل من الممكن ان تقرري اعتزال مجال تصميم الأزياء ؟ولماذا؟
،مش عارفه بس أنا بحب التصميم جداً واعتقد ان حتي لو في تعب في الشغل او ارهاق هافضل اصمم حتي لو بسيط
،،سوف تسمحي لأبنائك بالدخول إلي عالم الأزياء ليكملوا مسيرتك؟
،اه طبعا ياريت واتمني يبقي ليهم مصانع كمان ويبقي في خطوط إنتاج كبيره ليهم
،،ماذا يمثل الحب في حياة مصممة الأزياء الجميلة “نغم منير”؟
،الحب في حياتي كل حاجه أنا عاطفيه جداً بتعامل بقلبي بحب الناس جداً وبتعلق بيهم ومابحبش الوحده خالص
،،ماذا تعني كلمة “رجل” في قاموس نغم ؟
،الرجل بالنسبة لي حب أمان احتواء اهتمام دنيا ماشيه علي الحلو والمر وفي السراء والضراء
،،هل الزواج والأمومة عائقاً في تحقيق احلامك ؟
،الزواج والأمومه أكبر داعم ليا في شغلي الحمد لله
،،بهاء بيمثل لك ايه في حياتك؟
،بهاء إبني التالت واللي باقي من ماما وبابا
ماما كانت فرد واحد بس بعدها الدنيا فضيت أوووي ماحستش معني الوحده والحرمان الحقيقي الا بعد ماما ، وبهاء الحاجه الحلوه اللي بشوف فيها ماما وبابا وكتير بيبقي في تصرف معين بشوف ماما فيه وببصله واضحك واقوله ها يا ماما وبعدين
،،ما هي مواصفات سعيد الحظ الذي يمكن ان تقبلي ان تسلميه قلب إبنتك؟
،اللي ياخد بنتي لازم يبقي رجل يعني ستر وحضن وأمان واستقرار وحب
،،نغم ما هو سر حبك التصوير أمام المرآة؟ ،بحب المرايا
،،حزنتي جداً يوم وفاة الكلب بتاعك هل أنتي من الشخصيات اللي ممكن تفضفض مع كائن ضعيف كالكلب ولا بتعتبري ده من الجنون ؟
،حزنت جداً أنا بحب الكلاب بشكل غير طبيعي بيمسوا قلبي بحس معاهم بوفاء واخلاص مش موجود بيننا كبشر غير نظرتهم وحنانهم
انا ممكن افضفض مع اي حاجه واي حد مابعرفش افرمل وغالبا لما بفضل ادور علي سر ليا محدش غيري عارفه مش بلاقي، بحمد ربنا بعد موت ماما إن خالتو موجوده ربنا يديها العمر والصحه بشوف فيها ماما برضو وده بيهديني،أنا كنت بحس ان عيلتي كبيره بس للاسف العيله دي صغرت أوي وكل يوم بحلم باليوم اللي ولادي يكبروا فيه ويتجوزوا ويخلفوا ونزيد تاني ويتلمواحوليا
،،ما هي الصفه التي تودي تغيريها في او تُحبي ان تكون موجوده بشخصية نغم ؟
،التسرع والعصبيه احب يبقي عندي صفات حلوه كتير
،،ما هو أكثر قرار ندمتي عليه وتتمني أن يرجع الزمن حتي تغيريه؟
،الحمد لله قراراتي كلها غلط بس مش ندمانه علي اي قرار
،،من هو الشخص الذي تحبي أن تهدي إليه نجاحك الأن ؟
،ماما
،،تخيلي أنك ركبتي آلة الزمن ممكن تسافري لأي زمن وتعيشي فيه؟
،بتمني اروح زمن النبي عليه الصلاة والسلام واشوفه يارب اجعله شفيع لنا
،،ما هي الآية و المقولة التي تؤمني بها ولا تفارقك عند إتخاذ أي قرار؟
،من يتق الله يجعل له مخرجا ويرزقه من حيث لا يحتسب
،،وجهي رسالة لمن ظلمك دون ذكر أسماء ؟
،رساله للي ظلمني مممممم خاف من اللي مااخدش حقه بإيده وساب حقه لرب الكون ياخده لأن الله يمهل ولا يهمل ونهاية الظلم ظلمات
،،إذا جائتك الفرصة للإنتقام ممن ظلمك هل ستنتقمي ام ستسامحي؟
،مش هانتقم ابداً مش عارفه هاقدر اسامح ولا لأ ومش كل الظلم واحد يعني نسبه وتناسب حسب الظلم ده أذاني لأي درجه
،،وجهي رسالة شكر لاكثر إنسان طبطب علي قلب نغم؟
،مش عارفه اشكر مين ولا مين ولا مين اللي طبطبوا علي قلب نغم كتير ويستاهلوا علي حبهم ليا سعاده تملاء حياتهم كلها
