بقلم : داليا طه
ابسط كلمه لموقف يحصل مابين اتنين ، ان واحد يقول لتانى مع السلامه ، كل شئ انتهي .
انتهى الحب والتقدير والاحترام ، انتهت الاحلام والطموح ، انتهت الذكريات والايام الحلوه والمره .
انتهت انى اشاركك في ابسط الاشياء واصعبها ، خلاص مش حنقول صباح الخير ، مش حنبعد ساعات ونقول وحشتنى اللحظات دى ، مش حفرح ومش حيقسم فرحتى عليا انا وانت .
انتهت انتهى كل شئ قطعه قطعه كنا بنختارها لبس طرحه شوز جاكت بنطلون كنبه سرير سجاده كوبايه انتهت اننا ننقي كل حاجه مع بعض .
انتهت قعدتنا على الكورنيش ونبص للبحر ونوشوش بكل اللى في قلوبنا ، ونمسك الرمل ونرسم على الرمل قلب وسهم منى ليك وليك ليه .
انتهت نكون في كافيه ولا مطعم وندوق مع بعض ونقسم كوبايه الشاي والقهوه والعصير واللقمه نقسمها عليا انا وانت .
انتهت وجود حضنك اللى كان بيغنينى عن كل احضان اللى حواليه لانه كان حضن حبيبي وصديقي واخويا وابويا وابنى ماانت كنت كل دول .
انتهت المناديل اللى كانت تبوز من كتر الدموع الحزن والفرح ، مااحنا اما نفرح ندمع واما نحزن نبكي ودموعي ودموعك واحده ماتتفرقش .
انتهت قصتنا من قبل ماتبتدى ، انتهى عشقنا فلحظه هزيمه ، انتهى الحب فلحظه انانيه ، انتهيت انا اما قولت مع السلامه .
رئيس قسم هو وهي : داليا طه
