كتبت مدربه تربيه ايجابيه : شيرين محمد
جأتني ام تسأل ماذا افعل مع ابنتي انها تقوم بسرقة الشيكولاته من السوبر ماركت الصغير اللي بجوار منزلنا عندما كنت اتبضع واحتفظت بها دون علمي و اكتشفت بعد ذلك بالامر فماذا افعل عمرها ست سنوات … ده نص الرساله …طيب تعالوا نتكلم بقي
الاطفال في العمر ده مش بيعرفوا معني السرقه هي عجبتها حاجة مملوكه لغيرها فاحتفظت بيها لنفسها مش بيبقي وصلهم معني الملكيه الخاصه وان الحاجه دي ملك لصاحب السوبرماركت وعليا ان ادفع ثمنها قبل اخذها…طيب ايه الحل لما الاقي ابني محتفظ بحاجه مش بتاعته اولا مالفتش نظره بطريقة مباشره في وقتها ولكن انتظر واشوف وقت يكون طفلي هدي فيه واخده واحضنه و مهم جدا ميكنش حد معايا انا وهو بس لوحدنا.. اقوله انا عرفت انك اخدت الشيكولاته من السوبر ماركت دون دفع ثمنها و ابدأ اشاركه الموقف ده بموقف حصل معايا وانا صغيره … عشان مشعروش بالخجل من نفسه امامي مثلا تعرف وانا صغيره قدك سرقت بنبونى من محل لبيع الحلوه و كنت عارفه ان ده غلط وده خلاني اشعر بالذنب …. ممكن يقولك ساعتها طيب بس المحل عنده شيكولاتات كثير ايه يعني لما اخد واحده … هقوله اكيد عنده عدد كبير من الشيكولاتات والحاجات التانية اللي صاحب السوبر ماركت بيبعها عشان يدفع إيجار السوبر ماركت و عشان يدفع رواتب المواظفين و عشان كمان يكسب فلوس يصرف علي بيته … طيب انت لو مكان صاحب السوبر ماركت كنت هتحس بايه…. اكيد هتبقي مضايق و اكيد مش هتحب حد ياخد حاجتك بالطريقه دي …. طيب انت شايف تحل الموضوع ده ازاي …هيقولك ندفع ثمنها … هتقوليلو وانا هروح معاك كنوع من الدعم والتشجيع …… ارجوكم بلاش التقطيم ولا اللوم ولا العتاب …وبلاش كلامنا اللي بيسرق هيروح النار او ربنا هيعقبك علي اللي عملته …. احنا عايزين نحببهم في ربنا مش نخوفهم من ربنا … اه وبلاش طبعا انت عملت كده ليه هتطلع حرامي هو لسه مش فاهم ولسه بيتعلم وبيغلط عشان يتعلم من اخطاءه
دمتم إيجابيين
رئيس قسم هو وهي: داليا طه
