كتبت : نسرين محمد ابوزيد
عارف لما ربنا يبعتلك حد يحبك بدون شروط حد يطبط عليك بقلبه وعينيه يضمك ضمه صدق وحنان ويبعتلك دعوه في جوف الليل أول ما يرفع ايديه بلدعاء ؛ ده كنز بقي أعظم من كنوز الدنيا ومافيها بتكلم عن الأرواح الجميله الي حواليك القلوب الحانيه عليك ((الاصحاب)) ايوا الأصحاب متسمعش ومتسمعيش لموجه مفيش وفاء مفيش صداقه موجه الإحباط والكلام السلبي الي ملا الأجواء بسبب وبدون سبب علي العوالم الافتراضيه الي عايشين عليها ناس غالبا منعرفهاش ؛؛لكن تعالو بقا علي أرض الواقع هتلاقي اكيد اكيد حد بيقولك كلمه حلوة من القلب ليها القدرة انها تغير مودك ١٨٠درجه او وقفه جدعنه لله في لله كده بدون مقابل غير أنه بيحبك كده وخلاص ؛؛بلاش نتحول لبغبغوات عماله تردد كلام سلبي ملوش اصل من الصحه مش معنى انك قبلت حد وحش او اتنين أو حتى عشرة يبقي معندكش الالف الباقين الي في ضهرك ووراك ؛؛الاصحاب ممكن يكونو حد من اخواتك ممكن يكون حد من باباك ومامتك أو هما الاتنين سوا ؛؛الاصحاب ممكن تبقى صاحبه بتقبليها مرة في السنه بس بتدعيلك وروحها حواليكي طول الوقت ؛؛طب اقولك مجربتش مرة تبقي في ضيق وتجيلك رساله من حد من الناس الجميله دى تطمن قلبك وتقولك انا معاك وحاسس بيك مجربتش مرة تبقي بتتالم أو فعلا تعبان تعب جسدى ومجرد ما تقعد مع حد تنسي الالم ده وكانك خدت اعظم مسكن في التاريخ ؛؛طيب جربت لمسه علي جبينك من ايد ابوك يطمن علي حرارتك واللمسه دى تحضن قلبك من جوا ؛؛مجربتش ده وده وده ارجع بتفكيرك ؛؛افتكر لحظات النعم دي واوعي تنساها ومتنساش ومتنسيش ربنا قال ((سنشد عضدك باخيك)) يعنى هنقويك ونشدك بلناس الحلوة دى والرزق الكبير ده ؛؛؛واياك اياك تخلي اى مدخل لابليس اللعين لقلبك علي طول اقفل المدخل ده لأنه مش هيسيبك تفرح قوى؛؛هو شغلته يحزنك ويخليك في ضيق علشان متنتجش علشان متسعدش علشان متعلاش بقلبك ومشاعرك في السما علشان روحك تبقي متقيده هنا علي الارض؛؛انا وانت وانتى بقي من انهارده ومن دلوقتي هنغير ده فينا وحولينا ؛انشرو طاقات الحب والامل؛؛حب الصحاب احلي وأعظم واطهر من حب العاشقين والمحبين.
اهداء لاعظم واطهر واجمل قلوب نقيه رزقت بيهم ربي يديم النعم عليا وعليكم يا اصحابي وعلي كل قارىء لمقالي ؛؛حبو في الله واسعدو حبايبكم واسعدو بيهم
رئيس قسم انت الحياه: داليا طه
