شيرين محمد مدربة تربية إيجابيه معتمده من مؤسسة التربية الايجابيه الامريكيه
صاحبتي اتصلت بيا الحقيني ابني بيشتم و مش عايز يبطل شتيمه …. زعقتله …..قولتله متقولش الكلمه دي عيب كده …. ضربته مفيش فايده ….. اعمل ايه انا اعصابي تعبت … انجديني …. مينفعش كانت تسئلني قبل لما تعمل كل ده ….يالا اللي حصل حصل نتكلم بقي شويه عشان نوضح بعض الامور ….في عدة اسباب بتخلي الطفل يشتم
اولا :يكون سمع الكلمه من حد وبيقلدها
ثانيا: ممكن يكون بيحاول يلفت انتباه اللي حوليه بالشتيمه دي و بيشوف رده فعلهم اتجاه الشتيمه
ثالثا: ممكن جدا وهو صغير كنا بنلعب معاه ونقوله مثلا قول لعمو كذا كنوع من اللعب وبعد بقي لما كبر بقيت الكلمه دي غلط وعيب ومينفعش نقولها
طيب ايه بقي الحل اولا مينفعش ازعق او اشتم او اضرب لان كده المخ هيركز اكثر علي الكلمه السيئه …. اي سلوك بنركز علي مقاومته بيزيد …. لازم اخلي بالي من الكلام اللي بيتقال امام الطفل وننتقي كلماتنا … طيب سمع كلمه وحشه وبدأ يقولها الحل التجاهل ( وده بينطبق علي اي عاده سيئه بيعملها الطفل) نتجاهل في اول الامر …طيب مبطلش يقولها نحاول نستبدل الكلمه دي بكلمه تانيه يعني لو شتيمه مثلا ممكن تقوليله هنستبدلها بكلمه عسليه او فريكيكو او بسبوسه وشجعيه انه يقول الكلمه دي كثير وكده احنا علمناه كلمه جديده يقولها بدل الشتيمه …. ده هيساعده ان يبطل الشتيمه دي لكن لو سمع اي شتيمه تانيه هيقلدها هو عقله مش بيفلتر ايه اللي ينفع يتقال وايه لا … وهو اصلا مش فاهم معني الكلمه … هو سمع كلمه جديده وحب يقلدها لا فاهم معناها و لا عارف وقعها علي الناس ايه فنحاول نخلي بالنا علي قد ما نقدر من الكلام اللي بيسمعه الطفل
رئيس القسم داليا طه
