بكاميرا إيهاب سعيد
أنت أحلي م الصورة ..
متزعلش لو صورتك طلعت مش حلوه لأن ببساطه مش ملامحك هي السبب ، في حاجات مهمه لازم ناخد بالنا منها وإحنا بنتصور الصورة زي الأكلة الحلوه بالظبط بس بشرط لو طبخناها كويس ، ومش لازم تكون مصور فوتغرافي محترف عشان تصوّر أو تبقى وَسيم عشان تتصوّر الشيف جوستوه في فيلم “خلطابيطه بالصلصه” قال الطبخ للجميع وبرضو في التصوير أي حد ممكن يصور …
وعشان كده النهارده جاي أقولكم شوية نصايح أنا واثق إن بعدها مفهومك عن التصوير هيتغيّر وهتبقى بالنسبلك تجربه جميلة هتحب دايماَ تعشها،
لازم تعرف إن أي صورة عبارة عن “ظل و نور و زاوية تصوير” خلي القاعدة دي دايما في بالك ، طيب هنطبق القاعدة دي إزاي؟
بما إننا بنتكلم عن كاميرا الموبايل …
الأماكن المفتوحة: إختار الوقت المناسب وأفضل وقت تتصور فيه وأنت بره البيت هو بعد غروب الشمس مباشرةً لأن وقتها بتكون الإضاءة ناعمة وبتتوزع علي الوجة بشكل مناسب وده بيدي فرصة لملامحك تظهر بشكل أفضل من غير ما تلجأ لإستخدام الفلاش، لأنك لو إتصورت في الشمس بتعرّض نفسك لأسوأ ثلاث حالات :
الحاله الأولي .. لو الشمس مباشرة في وشك عنيك هتغمض ده غير السواد حوالين عنيك والظل أسفل الأنف وكفايه كده.
الحاله الثانية .. لو الشمس خلفك هتضرب في العدسة ويغطيك الظل وممكن تبص علي الصورة وتقول مين الأخ ده !!
الحاله الثالثة .. لو الشمس علي يمينك أو شمالك هيطلع نصف الوجه مضيء جداً والنصف التاني مظلم تماماً وده مش حلو.
كل المشاكل دي سهل التغلب عليها في مجال التصوير الإحترافي بإستخدام العواكس والفلاتر
الأماكن المغلقة: في الحاله دي إتأكد إن الإضاءة كفاية وبلاش تقف تحت مصدر الضوء عشان تتجنب التعامد الضوئي خلي مصدر الضوء قدامك وإتأكد إنك ماسح العدسه كويس لإن أي بصمه بتأثر علي جودة الصورة واطلب من اللي بيصورك انه ينبهك قبل إلتقاط الصورة عشان تتجنب البربشه ، إيه الكلمه الغريبه دي !!
إختار المكان المناسب: خد بالك من الخلفية كويس لأن مش إنت لوحدك اللي هتطلع في الصورة إكيد هيطلع معاك حاجات وراك وجانبك فعلي الأقل إختار إيه هيطلع معاك.
أوعي تستخدم الفلاش: فلاش الموبايل بيخلي الظلال حادة وأجزاء في الوجه بتتعرض لكمية ضوء عالية والنتيجه صورة مش حلوه، الفلاش ده عملوه بس عشان نطلع بيه ع السلم لما النور يكون قاطع او لما يقع منك جنيه فضه تحت السرير.
إتصور دايماً وانت مبسوط أوعي حد يغصب عليك تتصور وإنت مدايق لأن الـ 47 غضله اللي في وشك مبيعرفوش يكدبوا.
أقولكم ..أشوفكم الصورة الجاية
