بقلم دكتورة زينب زكى
موتي ملكة في بيت ابوكي افضل من انك تموتي جارية في بيت جوزك
اختاري اللي يعترف انك اميرة .. وان مجاش الأمير اللي يخطفك
كفاية انك خطفتي السعادة وعشتيها
لما تسمعي كلمة ” مش هنفرح بيكي بقى ” في كل مكان تروحيه
أحب اقولك ” متستعجليش ” لأن بمجرد ماتتجوزي هيقولولك مفيش حاجه جاية في الطريق ؟ !! وده لان الناس حافظة مش فاهمه ..
لما يجيلك عريس وتحسى انك فرحانه بيه .. لازم تسألي نفسك سؤال مهم جدا
انتي فرحانه علشان جالك عريس وهتلبسي الفستان الابيض ؟
ولا فرحانه علشان جالك راجل مفيش حد افضل منه في حياتك؟
لو للسبب الأول فإسمحيلي اقولك ” متستعجليش ”
أما لو للسبب التانى هقولك مليون مبروك وربنا يسعدك يارب وايااااااااااااااااااااااااااااااااااااااكي تستعجلي …
متستعجليش وتختاري عريس والسلام علشان تهربي من كلام طنط فلانة ولا كلام طنط علانة .. لأن طنط فلانة وطنط علانة مش هيبطلوا نميمه عليكي في الرايحة والجاية بعد ما تتجوزي ويتريقوا علي الكحل السايح بسبب دموع عينك اللي نازلة علشان تصرفات المحروس اللي استعجلتي واختارتيه
ايه يعني عندك دلوقتي ؟؟ 26 ؟؟ 30 ؟؟ 40 ؟؟ ولسه متجوزتيش ؟؟
طيب ماهي فلانة بنت ام فلانة متجوزة سن 18 ولا حتى 20 علشان فرحانة انها هتلبس الفستان الابيض وتهرب من الموال بتاع مش هنفرح بيكى بقى ..
فلانة دلوقتي معاها اربع عيال وحامل في الخامس وطالع عينها مع جوزها
اللي اعتبرها الة لزيادة عدد السكان ليس اكتر .. لا بتسمع كلمة حلوة ولا بيشيل معاها عيل ولا بيحتويها لما بتضايق .
تعالي بقي شوفي فلانة بنت ام فلانة 40 سنة ولحد النهارده متجوزتش .. لكن وشها كله بهجة والسعادة هتنط من عنيها .. حلاوة ايه واهتمام بالنفس ايه ومرح ايه علشان كدا هقولهالك اسمعى منى
متستعجلييش وتتجوزي حد طمعان في جسمك .. فلوس ابوكي .. جمالك .. شهادتك
.. شغلك ومرتبك .. عيلتك وانتي ناضجة وقادرة تفرقي بين طبيعة تفكير اللي قدامك .. وخدي بالك .. تسرعك مش هيعود عليكي انتي وبس بالفشل .. بالعكس
هيعود علي اطفالك اللي مش هتعرفي تحسني تربيتهم بسبب كسرتك وحزنك .. وعلي اهلك اللي هيحسوا بالندم انهم رموكي .. علي اصحابك اللي دايما هيشفوكي حزينه وبعيده عنهم .. وعلي مجتمعك اللي مش هتقدري تفيديه بأي شئ ..
الجواز مش جامعه هتسبيها وتشوفي غيرها ..
الجواز حياة .. الدبلة بدايته والموت نهايته
ماما زوزو
