وصفه انجليزيه شيك وطعمها روعه وتنفع للعزومات جداااا
كلتها مره في مناسبه وعجبتني ودورت علي الطريقه لحد ما لقيتها
هي طويله شويه بس بجد روعه وسهله
مقدمة من / مروة كمال
وقت التحضير / 20 دقيقة
وقت الطهي /
المقادير :
عرق فلتو وزن كيلو
فلفل اسود
بصل بودر
زبدة
لصوص الجريفي
زبدة
دقيق
شوربة
مشروم
بصل
توم
موستردة
عجينة بف بيستري جاهزة
الطريقة :
– عرق فلتو وزنه كيلو ونشيل كل الدهون اللي حواليه
نتبله بفلفل أسود وبصل بودره من كل الجهات ونسيبه عشر دقايق يتشرب التوابل
– في طاسه او صينيه تيفال نحط معلقه زبده ومعلقه زيت ونشوح عرق اللحمه من كل الجهات حوالي عشر دقايق لحد ما يتحمر من كل الجوانب
– وهو بيتشوح نبقي نرش عليه الملح ( مش هنحط الملح مع الفلفل في الاول عشان اللحمه ما تنشفش)
– نشيله من الطاسه ونحطه في ورق فويل ونقفل عليه كويس وهو سخن
( عشان اتأكد انه استوي دخلته فرن سخن حوالي ربع ساعه تقريبا وبعدين نسيبه يبرد خالص
– الزبده اللي شوحنا فيها العرق بقسمها نصين النص الاول باخده احطه في طاسه و بعمل بيه جريفي صوص يتقدم معاه
– الجريفي صوص تقريبا زي صوص البشاميل بس بدل اللبن شوربه
– معلقه زبده نشوح فيا معلقه دقيق كبيره ونسيبهم علي نار هاديه مع التقليب كل شويه حوالي عشر دقايق لحد ما الدقيق يبقي لونه دهبي نضيف عليه معلقه كبيره صويا صوص( اختياري)
– نضيف حوالي كوبايه شوربه مع التقليب لحد ما يتقل الصوص ونظبط الملح والفلفل
– النص التاني من الزبده اللي شوحنا فيها العرق وفي نفس الطاسه بشوح فيه بصله كبيره مقطعه علي نار هاديه خالص
– نضيف حوالي ربع كيلو مشروم فريش او معلب مقطع ونشوحه ونضيف ٤ فصوص توم مقطعين هنسيبهم علي نار هاديه خاااالص حوالي ربع ساعه ونقلبهم كل شويه وفي الاخر نضيف حوالي نص كوبايه شوربه ونظبط الملح والفلفل ونسيبهم لحد ما يتشربوا الشوربه وبعد كده لما يبردوا نضربهم في الخلاط او بالهاند بليندر لحد ما يبقوا زي المعجون
– نرجع تاني للعرق لما برد ندهنه بمسترده من كل الجهات
– نغطيه بمعجون البصل والمشروم من كل الجهات
– نجيب عجينه الباف باستري الجاهزه ونحط تحتها وفوقها رشه دقيق ونفردها بسمك نص سم ندهن اطراف العجينه بصفار بيضه مربوبه مع معلقه لبن ورشه فلفل
– نحط العرق علي العجينه ونلف العجينه عليه ونقفل الاطراف كويس ونحطه في صينيه بس قفله العجينه يكون لتحت
– نعمل فتحه بالسكينه علي سطح العجينه وندهنها بخليط صفار البيض واللبن
ندخلها الفرن تستوي ويتحمر الوش
– نسيبه يهدأ شويه ونقطعه طرنشات
– نقدم معاه الجريفي صوص وخضار سوتيه
شويه ملاحظات بقي :
– ( انا قطعت هنا العرق نصين عشان اضمن انه يستوي)
– ( ممكن العرق نقطعه طرنشات وهو ني ونتبله ونشوحه ونشتغل فيه بنفس الطريقه والعجينه نفردها ونقطعها مربعات وكل مربع نحط فيه قطعه فيليه ونقفله زي البؤجه )
– ( عجينه الباف باستري استخدمت القطعه الكبيره لو عندك المربعات الصغيره ممكن تحطيهم جنب بعض بس كل مربع طرفه علي طرف اللي جنبه ونلزقهم مع بعض بشويه ميه ونضغط عليهم بالنشابه عشان يلزقوا)
– ( أصل الوصفه تتعمل مع البصل والمشروم كبد وز او كبد فراخ بنقطعه حتت صغيره وبنشوحهم مع البصل ونهرسها )
– ( ممكن بعد ما ندهن العرق بالمسترده ونلفه بمعجون المشروم نلفه بشرايح رومي مدخن
و الف هنا على قلوبكم يارب
مدير مطبخ سحر الحياة / نيفين منصور
