تعرف على رسائل وأمنيات الفنان محمد التاجي في العام الجديد

أمنيات ورسائل نجوم سحر الحياة كتبته 

حاورته مها نور

الفنان ذو الوجه الطيب والأداء الصادق , دافئ المشاعر الوجه المصري الأصيل محمد التاجي 

يوجد أمنية مخبأة لك مع santa “بابا نويل” لم تتحقق بعد وتتمنى تحقيقها في العام الجديد فما هي؟

أتمنى على الصعيد العائلي أن بنتي تتزوج وابني ينهي دراسته في معهد السينما وأتمنى على الصعيد الفني تمثيل عمل عرض علي من سنتين وكان قدمه في السينما الحاج عبد الوارث عسر أتمنى أن تنتهي كتابته و ننفذه في الدراما

هل كنتِ راضي عن عام 2018 وما هي طموحاتك القادمة في 2019؟

الواحد لو رضي عن كل شئ يبقى معندوش طموح ويقول لنفسه خلاص أنا عملت كل حاجه حلوه وخلاص

أكيد أنا عملت حاجات كويسه في ٢٠١٨ بس بردو الطمع في الحالة دي بيكون من الحسنات وليس السيئات في حالة إنك تطمع إنك تعمل حاجة أحسن 

أنا قدمت عملين من أهم الأعمال اللي مثلتها مسلسل الشارع اللي ورانا لمجدي الهواري وحاتم حازم مثلت مسلسل فوق السحاب وكان أول تعارف بينى وبين رؤوف عبد العزيز وسعيد جدا بهذا الرجل وتجربتي معه

أما بالنسبة لطموحاتي في ٢٠١٩ مش هتخلص أتمنى أن في ٢٠١٩ ننفذ العمل الذي قدمه جدي العظيم عبد الوارث عسر وأتمنى إني أقدم مسرح محترم مع ناس محترمة تحترم خشبة المسرح تحترم مواعيدها لأن  للأسف أنا دخلت ثلاث تجارب وراء بعض اتنين منهم تركتهم تماما وواحده اضطريت استمر بها خمسة عشر يوم حتى يجدو بديل لي فأتمنى الرجوع للمسرح وأن يكون له بريقه ولا يكون مسرح سري ويكون معروف على مستوى الجمهور والا يكون مثل بعض مسرحيات مسرح الدولة التي لا يسمع عنها أحد

صندوق بوسطة سحر الحياة

رسائل حب وعتاب لمن ترسلها الفنان الكبير محمد التاجي ؟

رسائل الحب

لكل الناس والبشر والجماد والحيوانات كل مخلوقات الله في الأرض وبقول بحبك يا ربنا ويارب تحببني في كل الناس ومتخلنيش أكون شايل من حد في يوم من الأيام 

رسائل العتاب

في رسالة عتاب لكن مش هقدر أقول لمين هو عارف نفسه مكنتش أتوقع أنه يصبر على زعلي كل الفترة دي شخصيه المفروض أنها قريبة مني جدا وأنا زعلت منها زعل كبير وهو مهموش زعلي طيب أنت زعلان خليك زعلان أنا مش زعلان وعايز أكلمك يارب يفوق لضميره يارب

ماذا يمثل لك 

الحب: أهم شيء في الدنيا لو محستش بحب الناس في عيونهم وتشع حب على الناس يبقى ايه لزمتنا في الدنيا انا كفنان من الناس اللي بتحس بحب الناس إذا كان حب من القلب أم نفاق أهم شئ في الدنيا الحب اللي يجمع البشر كلها ويارب حبب فيا خلقك وتحببني في خلقك

البحر:

 هو الحبيب الرهيب والمخيف له أحاسيس متناقضة داخل الإنسان بعض ساعات تنظر له تشعر أن عمقه كبير وبعده يسحب ويخوف وسعات تبصي له تبقى عايز تحكي معاه اللي متقدرش تحكيه للبشر تبقى عايز تقعد على البحر وتقعد تحكي كأن حد أمامك يستوعبك وياخد سرك ويخفيه لأنه غويط هو ده فعلا اللي يتقال عليه سرك في بير مش هيطلع منه ابدا أنا بحب البحر أنا بعشق البحر على رأي نجاة وشايف البحر شو كبير للست فيروز

الغدر:

من كتر ما الواحد ما اتغدر بيه جثته نحست مبقاش يتوجع زي زمان اتقي شر من أحسنت إليه بس خلاص الواحد اتعود لأن اتغدر بينا طول السنين والعمر اللي فات كتير أوي والحمد لله أن الغدار هو اللي بيخسر مش انا

الأصدقاء:

انا بحب الأصدقاء جدا واللمه وأنا صغير كنت دايما بصاحب الكبار لأنهم بالنسبة لي كانو بنك المعرفة اللي بستقى منه معلوماتي لكن لما كبرت بقى غالبية أصدقائي من الشباب لأن بشوف فيهم شبابي وبستفيد منهم وبستقي منهم المعلومات يعني مثلا أنا كان لي في مسلسل ابن اسمه كريم عبد الجواد كنت لما بقعد معاه كان يوجهني لأنه كشاب كان فاهم نفسية الشاب التاني إحنا طبعا الزمن اتغير دلوقتى كان على أيامنا غير كده كان الأب أب والابن ابن لكن دلوقت الدنيا أصبحت غير أنا إحساسي بالشباب وصداقاتي معهم بتعطي لي روح تانيه 

العام الماضي:

العام راح بحلوه ومره بساعاته الجميلة والصعبة والحمد لله أيام ربنا كلها جميله وكلها امتحانات وتكفير ذنوب الحمد لله على كل حاجة أنا عارف إن لما بتعدي أيام صعبه أوي بتكون عند ربنا ابتلاء يرفعني درجات ويشيل مني ذنوب فالحمد لله على كل حاجه ربنا بيبعتها لنا 

كل سنه وكل مجلة سحر الحياة طيبين 

شكرا الفنان طيب القلب والمشاعر على تلك الهمسات التي أرسلها لجمهوره عبر مجلة سحر الحياة


إقرأ أيضا
النجمة سيمون ” والداي علموني الرضا والتفاؤل ومصر ستظل رائعة وباقية بشعبها